“Acoso inmobiliario” da Xunta contra unha muller de avanzada idade

A deputada socialista Noela Blanco presentou unha batería de iniciativas parlamentarias fronte ao presunto caso de acoso inmobiliario que vén de ser denunciado pola Fiscalía de Ourense contra dous cargos da Xunta. A Fiscalía diríxese contra a secretaria xeral técnica e o subdirector de Patrimonio de Facenda por “extralimitarse” para lograr o desaloxo da inquilina dun inmoble do goberno galego.

Blanco reclámalle ao goberno galego que dea conta das responsabilidades que pensa asumir “ante a solicitude da Fiscalía de Ourense de que se cite como imputados” a estes cargos “por un presunto delito de acoso inmobiliario”. A parlamentaria socialista alerta da gravidade desta denuncia “por presuntas medidas de presión non lexítimas coas que a Xunta intentou desaloxar á inquilina”, unha muller de avanzada idade que vive no edificio dende 1963.

A muller residía nunha vivenda alugada á Cámara de Comercio de Ourense en 1963, nun edificio que foi adquirido polo goberno galego en 2012, momento en que “a administración tratou de recuperar o inmoble”. Segundo explica a querela da Fiscalía, o acoso incluíu “a supresión do mantemento das zonas comúns do edificio, deixando de realizar limpezas e reparacións, non substituíndose a iluminación e non realizando o mantemento de servizos como o ascensor”.

A situación chegou a que a vivenda quedou sen ascensor dende xaneiro de 2018, e finalmente, en xullo deste ano, a muller sufría unha caída e rompía a cadeira, víndose efectivamente obrigada a abandonar o edificio.