A Xunta debe implantar un Plan Integral de Rexeneración das Rías e dos ríos de Galicia

O portavoz de Medio Ambiente do Grupo Socialista, Pablo Arangüena, vén de presentar unha batería de iniciativas parlamentarias para reclamarlle á Xunta un plan integral de rexeneración das rías e dos ríos de Galicia nesta Lexislatura. Reclamou unha “intervención firme e decidida” do goberno galego para reducir os niveis de contaminación e evitar que a UE siga impoñendo sancións polo incumprimento da normativa comunitaria.

O responsable socialista criticou que o desleixo do goberno galego “erosiona a credibilidade do país, resta recursos que se poderían dedicar á mellora da calidade da auga e ameaza o acceso a posibles fontes europeas de financiamento”.

Reclamoulle así ao goberno galego un plan que garanta o mantemento en condicións das infraestruturas existentes, mellore as Edar e o proceso de tratamento e xestión dos vertidos das augas residuais a través da súa depuración e entenda a rede de tratamento do saneamento, evitando os vertidos continuos ou fora de parámetro.

Advirte que, despois da visita dunha comisión de eurodeputados para revisar a depuración das rías en 2013, España foi sancionada pola falla de tratamento en Santiago, Vigo e Ribeira. Agora enfróntase ademais a outros procedementos de sanción en materia de saneamento e depuración no eixo Pontevedra – Marín – Poio – Bueu, mentres Augas de Galicia ten detectado, no ano 2019, un total de 1.575 vertidos na costa galega.

A situación en Galicia, dixo, é “especialmente preocupante”, por canto 20 anos despois da aprobación da directiva Marco da Auga “a situación de contaminación das rías galegas é especialmente grave”.

Sinalou que “a ninguén se lle escapa que este desastre ten que ver coa herdanza que deixou o Goberno de Rajoy e coa nefasta xestión do goberno galego en materia de depuración de augas residuais”.

Explicou que “a cuestión está en que o Estado vai repercutir sobre as comunidades autónomas responsables do incumprimento de tódalas sancións” e neste momento “está ultimando o Plan nacional de depuración, saneamento, eficiencia, aforro e reutilización, cun investimento estimado de preto de 10.000 millóns de euros nos vindeiros 18 anos”.

Pablo Arangüena explicou que “o problema da contaminación das rías e dos ríos de Galicia non é tan só medioambiental, senón que tamén económico por canto merma a riqueza acuícola, piscícola e marisqueira das nosas rías, das que dependen milleiros de postos de traballo en Galicia”. Lembrou que “Galicia, o país dos mil ríos, é tamén a primeira Comunidade Autónoma en quilómetros de costa”.