O secretario xeral do PSdeG-PSOE lembra que os recortes do PP en materia sanitaria deixan a Atención Primaria “ao borde do colapso” fronte á sexta vaga da covid

O secretario xeral do PSdeG-PSOE, Valentín González Formoso, esixiulle ao goberno galego que acompañe as novas restricións anunciadas hoxe diante da sexta onda da covid de medidas de reforzo da Atención Primaria e a sanidade pública. O responsable socialista lamentou que o conselleiro de Sanidade eludira incluír na súa intervención de hoxe “ningún tipo de referencia ou medida de reforzo do sistema público de saúde, especialmente na Atención Primaria, que está ao borde do colapso”.

Considera “incomprensible” que na situación actual, con máis de 28.000 casos activos de covid e en plena expansión dunha variante especialmente contaxiosa, o conselleiro evitara poñer sobre a mesa medidas de choque para evitar a posible saturación ou colapso do sistema sanitario público que “tivo tempo de sobra de preparar” nas últimas semanas.

Advirte que o recorte de medios e persoal na sanidade pública durante anos de gobernos do PP poñen a Galicia nunha posición de especial vulnerabilidade ante unha situación excepcional, que evidencia a necesidade inaprazable de reforzar o sistema sanitario e preparalo para as consecuencias da nova vaga de contaxios que está a experimentar Galicia.

Lamentou que a forza dos feitos evidencien o risco do que os socialistas galegos viñeron advertindo dende o momento no que Feijóo decidiu rescindirlle o contrato a máis de 500 profesionais sanitarios de reforzo para a pandemia. Considera “necesario e urxente manter e reforzar a plantilla de profesionais que están a realizar unha tarefa vital para garantir a sanidade de tódolos galegos e galegas”.

Eufemismos

Máis alá do apoio ás medidas dispostas para minimizar os contaxios nas festas de Nadal, o líder dos socialistas reclamoulle ao goberno galego que “lle chame ás cousas polo seu nome e se deixe de eufemismos” como denominar “toque de non – queda” ás restricións horarias.

Subliñou que os socialistas galegos respaldan as medidas dispostas para evitar as aglomeracións, pero “definilo como toque de non – queda semella unha inocentada.

González Formoso afirmou que o conselleiro “prefire dar un rodeo” para evitar contradicir ás críticas de Feijóo contra o toque de queda noutros momentos da pandemia.

O responsable socialista puntualiza que “eufemismos como toque de non – queda ou cabalgata estática deben ser clarificados no DOG” para que os galegos e as galegas teñan claras as medidas que dita o Executivo tanto nos horarios de ocio como nas celebracións de datas como a de Reis.