O portavoz de Sanidade do Grupo Socialista, Julio Torrado, denunciou hoxe o “rodillo inasumible” do PP no trámite da reforma da Lei de Saúde, que hoxe finalizou o trámite en Comisión e será votada finalmente no próximo Pleno do Parlamento. Criticou que logo de máis de 100 alegacións da sociedade e máis de 100 emendas da oposición, “aceptaron 3 e transaccionaron 1”.

O responsable socialista criticou que o PP se teña negado a garantir os servizos sanitarios e os acusou de “afondar na perda de servizos para establecer cidadáns de segunda e de primeira”. Advertiu que “a garantía de servizos é a nosa obsesión” e por iso presentou unha emenda para establecer un catálogo mínimo que estableza as prestacións sanitarias ás que teñen dereito tódolos galegos e galegas “independentemente de onde residan”.

Torrado sinalou a notable perda da calidade asistencial que sufrirán por exemplo os cidadáns das áreas sanitarias de Salnés, A Mariña, Valdeorras e Monforte, que verán recortados os servizos nos seus hospitais logo de que sexan subordinados ás áreas urbanas.

Apuntou á transacción entre os grupos para garantir o dereito á participación, que “queda por debaixo porque cando chegamos á concreción suprimen a posibilidade de emitir informes sobre os servizos nos hospitais nin na área sanitaria”.

Amosou tamén o seu escepticismo pola aprobación dunha comisión de control da investigación proposta polos socialistas pero sen concretar as funcións nin competencias, e engadiu que “a Xunta non entende a necesidade de controlar os investimentos nin os avances de I+D”.

Mobilización

Torrado criticou que a Lei sexa tramitada “ás agochadas, sen que ninguén o soubera, sen anuncialo nin plantexalo e sen comparecencia previa do conselleiro” e sinalou que “en 11 meses non quixeron falar do asunto”. A pesares diso, subliñou a importante contestación social provocada por esta Lei tanto nas áreas sanitarias abocadas á súa desaparición como na gran manifestación celebrada na capital galega.

Apuntou que con estas mobilizacións “ocorreu o mesmo que onte –na Manifestación en defensa da Igualdade-, que o PP intentou ningunealas, pero igual que coa de onte vai ter que aceptalas coa cabeza baixa e dicir que xa estaban niso”. Engadiu que “a pesares de que neguen a realidade, saben que tamén se equivocaron” e criticou o seu “orgullo e incapacidade de asumir que non poden exercer o poder de maneira ditatorial”.

Ademais sinalou “incoherencias enormes” ao sinalar na exposición de motivos que a Lei de Saúde é “un dos motores de desenvolvemento económico de Galicia” pero despois renuncian a pedirlle ao CES un informe porque “non se aprecia vencello co desenvolvemento económico e social” da Lei.