O portavoz do Grupo Socialista, Xoaquín Fernández Leiceaga, apelou hoxe ao PP para que asuma “a máxima responsabilidade” e admita “unha transformación radical da política forestal”. Así o dixo diante da constitución, hoxe, da Comisión de Estudo dos incendios e para a reforma da política forestal de Galicia.

Anunciou “propostas realistas e ambiciosas” para “transformar de maneira radical a política forestal de Galicia e o tratamento da prevención e da extinción de incendios”. “Veremos a actitude do PP –dixo-, sobre quen recae a máxima responsabilidade” ao apoiar ao goberno e a xestión da política forestal que derivou nos incendios de outubro, nos que faleceron 4 persoas e que calcinaron 50.000 hectáreas nunha soa fin de semana.

Sinalou que o órgano que se constituíu hoxe debe contar cun plan de traballo ao remate do Nadal para concluír co seu traballo no período de sesións que remata o próximo mes de xullo. Daquela deberá ser aprobada, dixo, unha proposta de reforma “a fondo” da política forestal” para que os lumes “teñan un impacto moito menor en Galicia”.

O responsable socialista alertou dun Plan Forestal “que non se aplica”, así como a lexislación en materia de prevención, cun goberno “excesivamente centrado na extinción”. A actuación do goberno galego, obviando as consecuencias do cambio climático e dun desenvolvemento desordenado da masa forestal derivado do abandono do rural que, combinados, provocan situacións como a da fin de semana do 15 de outubro.