O PSdeG comunica o pasamento da deputada Isaura Abelairas: “Referente no seu compromiso socialista, foi sempre unha gran loitadora pola inclusión social, pola igualdade e pola educación pública”
Gonzalo Caballero chama á Xunta a “aliarse” coa Costa da Morte e Bergantiños e homologar o Camiño dos Faros: “É fundamenta para o desenvolvemento, o emprego e o turismo da zona”
03/06/2021
O PP rexeita a creación dun centro de día para maiores en Ponte Caldelas
03/06/2021
O secretario xeral do PSdeG amosa “a gran tristura dos e das socialistas galegas” e salienta as ganas e forza de Abelairas que, durante dúas décadas, entregou a súa vida a facer a mellor política
A deputada socialista no Parlamento de Galicia Isaura Abelairas faleceu esta madrugada a consecuencia dunha longa enfermidade. Abelairas foi, ata o último día, unha referente na defensa dos servizos públicos e da loita contra a desigualdade.
Natural de Taboada e viguesa de adopción e sentimento, Abelairas era mestra de profesión, cargo que exerceu no CEIP Emilia Pardo Bazán (Chouzo) de Vigo dende 1993 a 2007, escola onde tamén foi directora.
De xeito paralelo, desenvolveu a súa vida na política municipal, sendo concelleira de Limpeza e Festas no Concello de Vigo entre 1999 e 2003 e posteriormente concelleira de Servizos Exteriores e Vías e Obras. Tamén foi responsable de Cultura, Igualdade e Normalización Lingüística, e nas dúas últimas lexislaturas exerceu como responsable de Política Social no Concello de Vigo.
Ademais, foi deputada provincial entre 1999 e 2003 e, dende 2007, foi a responsable de Igualdade na Deputación de Pontevedra. No ano 2020 concorreu nas listas do PSdeG ao Parlamento de Galicia como número 2 da provincia de Pontevedra e, dende entón, exercía como parlamentaria socialista na Cámara centrandose nos ámbitos de igualdade, LGTBI, Valedoría do Pobo, Emigración, CRTVG e Voluntariado.
Destacada activista do feminismo, da igualdade e da educación pública, Abelairas deixa un gran pesar na familia socialista, partido no que militaba dende hai tres décadas.
O secretario xeral do PSdeG, Gonzalo Caballero, amosou nas redes sociais o seu pesar polo ocorrido e recoñeceu a figura da deputada viguesa. “Deixounos unha gran amiga e compañeira, a miña querida Isaura, sempre socialista e feminista, optimista e loitadora ata o último momento”, destacou.
Así, o máximo dirixente das e dos socialistas galegos recoñeceu o traballo e dedicación de Abelairas no Parlamento de Galicia, na Deputación de Pontevedra e no Concello de Vigo. “Defensora das causas xustas, da igualdade, da educación pública”, enxalzou.
