O PP veta a nosa proposta para frear a violencia económica contra as mulleres

A portavoz de Igualdade do Grupo Socialista, María Pïerres, cualificou hoxe de “incomprensible” o veto do PP a unha proposición non de Lei presentada polo Grupo Socialista para pedirlle á Xunta que tome medidas para frear a “violencia económica” contra as mulleres. Pierres reclamáballe á Xunta que cambie as figuras impositivas da súa competencia e protexa así a capacidade económica das vítimas de violencia de xénero.

Pierres alertou fronte a unha violencia “silenciada” que queda relegada á “invisibilización” por parte da Administración ano tras ano e esixe de “novas respostas” para permitir que as vítimas de afasten do ciclo da violencia e refagan a súa vida. Non cumprir cos pagos estipulados polo xulgado, ou non facer fronte ao pago da hipoteca son só algúns exemplos destes “modos de perpetuar o control, de obrigar á muller a non romper nunca o vencello co maltratador”.

Trátase de maltratadores que atopan así “o modo de continuar humillando” con mecanismos mesmo sibilinos “que nin sequera rozan o ilícito penal” como son “eses pequenos retrasos no pago da pensión ou dos pagos das obrigas compartidas ás que a vítima está atada”. Sinala que se ben a administración non pode resolver enteiramente as consecuencias, si que pode “minorar e apoiar a protección patrimonial e económica destas mulleres, así como dos seus fillos e fillas”.

Modificacións no IRPF

Apunta así a posibles modificacións no IRPF “para que unha vítima non teña que asumir a débeda do maltratador no caso de tributación conxunta” e acadando así que “a parte da débeda, correspondente á cota autonómica, quede exenta”, ou tamén activando deducións por aluguer ou adquisición de vivenda.

María Pierres reclamou poñer o foco sobre un tipo de violencia que “segue sen ter estatísticas suficientes que permitan un estudo específico da súa incidencia, da súa convivencia con outro tipo de violencias, en definitiva datos que permitan unha valoración máis ampla”. Advertiu de que “corremos o perigo de crer que esta é unha cuestión que se reduce a un problema de insolvencia e incapacidade económica das vítimas”.