Silvia Longueira propón centros ou espazos específicos nas residencias onde atender aos enfermos de ELA en Galicia

A portavoz de Política Social do Grupo Socialista, Silvia Longueira, reclamoulle hoxe á Xunta que impulse a investigación sobre a Esclerose Lateral Amiotrófica -ELA- e garantir o desenvolvemento do tratamento desta enfermidade. A responsable socialista interveu na comparecencia do director xeral de Atención Sociosanitaria na comisión de Sanidade do Parlamento para dar conta das axudas aos pacientes con esta enfermidade.

A parlamentaria socialista pediulle ao goberno galego que poña “unha pica en Flandes” no camiño da investigación como única solución a unha doenza singular que “está aquí para quedarse”. Longueira trasladoulle as demandas dos enfermos e familiares de ELA, que reclaman unha atención especializada nos coidadores, que suporía “un cambio pequeno” para o goberno galego e unha axuda “grandísima” na atención a estes doentes.

Lembrou que as características específicas desta enfermidade require dunhas habilidades específicas no manexo da maquinaria que teñen que utilizar os e as doentes e unhas aptitudes concretas para os encargados da súa atención.

Ademais puxo sobre a mesa a necesidade de dispor de instalacións específicas ben dentro das residencias ou ben a través de pequenas residencias especializadas no entorno dos doentes nos que poidan ser atendidos nas mellores condicións nos momentos finais desta enfermidade. Lembrou o compromiso do goberno de España e dos socialistas, que puxeron en marcha a primeira Lei específica e recursos concretos para atender aos pacientes vítimas desta doenza.