O Grupo Socialista leva ao Parlamento a situación da poboación de Leiro, obrigada a agardar ao aire libre polas restricións motivadas pola pandemia

A parlamentaria socialista Marina Ortega vén de presentar unha serie de iniciativas parlamentarias para reclamarlle ao Sergas que instale medidas de protección básicas contra a intemperie para os doentes que teñen que agardar pola atención médica no exterior do Centro de Saúde de Leiro. Ortega reclámalle á Xunta que acorde co Concello a instalación dun medio de protección básico.

A responsable socialista reclamoulle ao goberno galego que atenda ás demandas dos veciños e veciñas da localidade, que “solicitan que se cubra dito espazo para se protexer do frío, choiva e, nas épocas estivais, das altas temperaturas que adoita ter o dito Concello”. Os socialistas galegos levan estas demandas á Cámara autonómica en forma de iniciativas parlamentarias para que a Xunta “acondicione o espazo para as zonas de espera externas”.

Ortega demanda “protexer aos doentes das condicións meteorolóxicas, especialmente ás persoas maiores, que ocupan o groso de doentes dentro do sistema público de saúde galego”, e sinaladamente nun concello como o de Leiro, de 1.500 habitantes en nove parroquias cun marcado envellecemento.