O Grupo Socialista esíxelle ao goberno galego que “como mínimo” triplique a superficie da Rede Natura no horizonte de 2030

Paloma Castro lamenta o voto en contra do PP a ampliar a protección medioambiental, modificar o Plan Director da Rede Natura e compensar aos propietarios dos terreos protexidos

A portavoz de Medio Ambiente do Grupo Socialista, Paloma Castro, esixiulle hoxe ao goberno galego que “como mínimo” triplique a superficie incluída na Rede Natura de aquí ao ano 2030. Castro lamentou o voto en contra do PP á proposición non de Lei que presentou na Comisión de Medio Ambiente de hoxe para ampliar e mellorar a protección medioambiental dos terreos protexidos.

A responsable socialista acusou ao PP e ao goberno galego de facer unha política medioambiental “de papel” sen efecto real, por canto Galicia é a Comunidade Autónoma con menos superficie protexida do Estado. Esta situación provocou a reprimenda da Comisión Europea, que en agosto de 2022 advertía que o Plan director para a xestión destes espazos incumpría os requisitos da Directiva Hábitats.

Lembrou que a ampliación destes espazos foi posta en marcha polo goberno presidido polo socialista Pérez Touriño pero o goberno do PP parouna en 2009, e malia o compromiso aprobado no Parlamento en 2017 e 2021 a iniciativa do Grupo Socialista e os sucesivos anuncios do goberno galego esta permanece paralizada.

Explicou que a propia organización ecoloxista WWF advertiu que Galicia ten “o peor” Plan director de todo o Estado. Os socialistas galegos presentaron esta iniciativa para reclamarlle ao goberno galego que modificara o dito Plan director para “melloralo e adaptalo á normativa europea”, ademais de ampliar a superficie protexida e incorporar un fondo de compensación para os propietarios dos terreos incluídos nos espazos protexidos de Galicia.

Paloma Castro esixiulle ao goberno galego “accións reais que axuden a cumprir cos obxectivos do Pacto Verde Europeo”, e lembrou que ata o momento só fixeron “anuncios” da ampliación, “pero nada se fixo”. Advertiu que o portavoz do PP asegurara hoxe que a ampliación quedaba novamente adiada ata 2027, o que fai “moi difícil” cumprir cos obxectivos cara o 2030.