Francisco Rivera fai un chamamento ao goberno galego para que “esgote a súa capacidade de endebedamento e de gasto” ante un “momento dramático para o conxunto do país”

O responsable de Economía do Grupo Socialista, Juan Carlos Francisco Rivera, criticou que as axudas da Xunta para os sectores máis afectados pola covid sexan “insuficientes” e estean “chegando a pingas”. Fíxoo, hoxe, no Pleno do Parlamento, trala presentación dunha moción, que foi rexeitada polo PP.

Francisco Rivera incidiu en que as medidas do goberno galego “non teñen empaque para impactar nunha crise como a que estamos vivindo” e subliñou que “os orzamentos da Xunta permiten unha reacción moito máis amplia da que está a dar neste momento”. “Non pedimos que a Xunta adoite solucións máxicas e imposibles, pedimos respostas para esta situación dentro das capacidades orzamentarias da Xunta”, aseverou.

Nesta liña, instou ao goberno galego a que “esgote a súa capacidade de endebedamento e de gasto” ante un “momento dramático para o conxunto do país”, tendo en conta que dispón duns “orzamentos expansivos que incorporan 1.574 millóns de euros de suplemento de gasto grazas ás achegas do goberno do Estado”. Así, destacou que “sen Orzamentos Xerais do Estado, este tipo de transferencias serían imposibles”.

O responsable socialista pediu á Xunta que “escoite as demandas da FEGAMP”, en relación aos fondos autonómicos dedicados aos concellos e á cobertura por parte da Xunta do financiamento de servizos prestados polas administracións locais “que van máis alá das súas competencias”.

Así, requeriu ao goberno galego a aprobar “de xeito inmediato” axudas directas ao sector dos hoteis, restaurantes e cafeterías “por importe de 100 millóns de euros”, xa que as axudas aprobadas ata o de agora son “insuficientes”. O socialista subliñou que “se facemos contas” e dividimos os “17 millóns de euros entre os 19.000 negocios de hostalería que hai en Galicia, as axudas saen a pouco máis de 800 euros por negocio”.

Doutra banda, urxiu ao goberno galego a dotar dun fondo extra de 70 millóns de euros para “compensar aos concellos, principalmente pola desinfección das escolas e polos gastos de emerxencia social” derivados da situación da covid.