Begoña Rodríguez Rumbo esíxelle a Rueda unha “explicación clara” sobre os criterios de reparto dos 15,6 millóns de euros adicionais de cooperación local aprobados onte

A portavoz de Facenda e Política Municipal do Grupo Socialista, Begoña Rodríguez Rumbo, vén de esixirlle á Xunta que garanta o reparto obxectivo e equitativo dos 15,6 millóns de euros adicionais de cooperación local anunciados onte. Rodríguez Rumbo lamentou a “resposta titubeante” ofrecida onte polo presidente da Xunta e demandou “criterios claros” que garantan unha xestión “impecable” dos recursos públicos en período preelectoral.

A responsable socialista esixiulle ao goberno galego que “abandonen calquera intención de facer un reparto de fondos a modo de pedreas da lotería” para beneficiar a candidaturas afíns nas próximas eleccións municipais. Rodríguez Rumbo anunciou neste sentido unha batería de iniciativas parlamentarias para fiscalizar a actuación do goberno galego de aquí aos próximos comicios.

Lamentou que o cambio de titularidade no goberno galego non teña suposto sen embargo a muda das peores prácticas á hora de utilizar os recursos públicos con motivos puramente electorais, como puxo de manifesto recentemente empregando o Executivo para artellar unha campaña de promoción descarada dos candidatos municipais do PP.

Recuperou o rosario de actos ao longo de toda Galicia, comezando por Ferrol, onde que a conselleira de Infraestruturas anunciou investimentos financiados polo Plan de Recuperación, Transformación e Resiliencia xunto co candidato do PP deixando fora ao alcalde da localidade, o socialista Ángel Mato.

En Viveiro, o delegado territorial do goberno galego fixo a entrega de chaves dunha vivenda en Mondoñedo e Viveiro xunto co alcalde da primeira localidade, do PP, e o portavoz de Viveiro, do mesmo partido, pero no que a alcaldesa, María Loureiro, foi excluída. O mesmo sucedeu en Vilalba, onde os concelleiros do PP e o delegado territorial anunciaron proxectos de mellora no IES Lois Peña nun acto no que a alcaldesa, a socialista Elba Veleiro, non foi convidada.

Lembrou que o delegado territorial da Xunta en Pontevedra anunciara a través da web da Xunta varios investimentos para o concello xunto coa candidata do PP nun acto para o que a alcaldesa socialista Verónica Pichel, tampouco foi avisada, mentres o xerente da área sanitaria de Pontevedra confirma melloras no PAC ao candidato do PP pero non á alcaldesa Marta Freire.