Nova etapa no Valedor do Pobo

A portavoz de Xustiza do Grupo Socialista, Patricia Vilán, chamou hoxe a abrir unha nova etapa na Oficina do Valedor do Pobo logo de que a súa actual titular presentara a renuncia. Vilán instou a Milagros Otero a que “deixe de representar a unha institución” que “non pode seguir sendo danada por unha persoa que ten unha condena ás súas costas” por facerlle un posto á medida da irmá do portavoz do Grupo Popular.

Así o dixo logo de que a Valedora enviara unha carta ao presidente do Parlamento “formalizando a súa renuncia” apelando ao artigo 5.1.5ª da Lei do Valedor, que determina o cese do seu titular “por ser condenado, mediante sentenza firme, por delito doloso”. Vilán chamou a organizar o relevo no horizonte máis curto de tempo seguindo o procedemento que “marca a Lei do Valedor” para designar un novo titular.

Milagros Otero asinou esta misiva despois de que o Tribunal Supremo ratificara a sentenza do Tribunal Superior de Xustiza contra ela do pasado mes de xuño por “arbitrariedade” e “desviación de poder” ao facerlle un posto á medida da irmá do portavoz do Grupo Popular. A Valedora presentou un recurso de casación diante do Supremo que vén de ser rexeitado, esgotando con iso a vía xudicial.