Reivindica esta ferramenta como “esencial” para facer “máis eficaces” as políticas públicas dirixidas a un colectivo “cada vez máis amplo e, en ocasións, vulnerable”

A voceira de Igualdade do Grupo Socialista, Noa Díaz, urxiu hoxe ao goberno galego, a través dunha batería de iniciativas presentadas no Parlamento de Galicia, a crear o rexistro de familias monomarentais e monoparentais para regular estas unidades familiares, tal e como esixe a lei.

Neste sentido, a deputada socialista reivindicou esta ferramenta como “esencial” para definir a tipoloxía de unidade familiar, coñecer cantas existen no noso país e cal é a súa situación actual. Isto permitirá, incidiu, facer políticas públicas “máis eficaces” dirixidas a un colectivo “cada vez máis amplo e, en ocasións, vulnerable”.

Ao fío disto, Díaz lembrou que debe ser o goberno da Xunta que defina as características e requisitos que debe reunir unha unidade familiar para ser considerada familia monomarental ou monoparental.

Así, despois da publicación da Lei 5/2021, de 2 de febreiro, de impulso demográfico de Galicia, que fixaba un prazo de seis meses dende a súa entrada en vigor para a súa elaboración, a Xunta anunciou o pasado mes de xullo que “estaba ultimando” o decreto para o que contaba coa colaboración da Asociación Nais Solteiras por Elección (MSPE) de Galicia, pero, lamentou Díaz, “catro meses despois, aínda nada sabemos del, a pesar de que tiña que estar rematado en agosto”.

Por último, Díaz puxo en valor a posta en marcha deste mecanismo para establecer a condición especial destas unidades familiares como merecedoras de protección específica, ao tempo que ocorre o mesmo co colectivo de familias numerosas que reciben múltiples bonificacións pola súa condición.

“É xusto que as familias monomarentais e monoparentais poidan ser recoñecidas como tal e recibir un trato preferente pola súa condición en determinadas circunstancias e ámbitos”, concluíu.