A voceira de Turismo do Grupo Socialista, Leticia Gallego, urxiu á xunta que amplíe os aforos dos albergues ou, se a situación sanitaria non o permite, que ofreza “alternativas” para hospedase no Camiño. Fíxoo, hoxe, no Pleno do Parlamento coa presentación dunha pregunta ao goberno, antes de manter un encontro cos representantes do sector hostaleiro que hoxe se concentraron nas portas do Parlamento, no que participou o secretario xeral do PSdeG. Gonzalo Caballero.

Ao fío disto, Gallego censurou hoxe a “falla de previsión” do goberno galego con respecto ao Camiño de Santiago cando durante este verán “moitos albergues colgaron o cartel de completo” e, como consecuencia, moitos peregrinos quedaron sen lugar onde poder durmir. Replicoulle ao conselleiro da Vicepresidencia, que cualificou a situación de “anécdota”, que “anécdotas coma esta fan que a xente non volva a Galicia”.

“Xa lle adianto que agora vai acontecer o mesmo porque dende o 15 de setembro ao 15 de outubro moitos albergues xa teñen todo reservado”, alertou a voceira socialista, quen subliñou que como non busquen unha alternativa, “outra vez os peregrinos non terán onde durmir”.

Por todo isto, instou ao goberno galego a dar “unha solución urxente”, xa que “esta imaxe non é boa nin para o turismo nin para o Ano Xacobeo, nin para Galicia”, o que implicará que estes turistas “non volverán a Galicia pola mala organización, falla de coordinación e nula planificación” do goberno galego.

Gallego reclamoulle ao conselleiro que manteña un encontro cos representantes do sector das verbenas, que hoxe se concentraron no exterior do Parlamento para demandar unha interlocución que o goberno galego, aseguran, lles está a negar.