Leticia Gallego reclama axudas directas da Xunta para o sector das orquestras, ademais dun protocolo específico e a súa incorporación á programación do Xacobeo

A portavoz de Turismo do Grupo Socialista, Leticia Gallego, vén de reclamarlle á Xunta medidas concretas de apoio ao sector das orquestras, especialmente danado polas restricións derivadas da pandemia. Gallego presentou unha emenda para completar unha proposta do PP debatida hoxe en Comisión parlamentaria pedindo axudas directas, un protocolo específico e a incorporación do sector á programación do Xacobeo.

O PP rexeitou as aportacións do Grupo Socialista, polo que a iniciativa foi aprobada limitándose a pedir unha defensa xenérica do sector e sinalando aos concellos, que “xa están saturados”, obrigados a asumir competencias propias do goberno galego. Gallego lamentou que o PP utilice ao Parlamento para conceder un apoio “de cara á galería, pasándolle a pelota aos concellos e eximindo ao goberno galego de calquera obriga ou responsabilidade”.

Advirte de que o sector “síntese enganado unha vez máis pola Xunta de Galicia”, que mantivo o seu contacto con eles “ata o día despois das eleccións autonómicas”, e seguen agardando dende entón por un encontro co Vicepresidente Primeiro do goberno “que nunca da chegado”.

Gallego sinala que das 120 orquestras que había hai 3 anos en Galicia, hoxe tan só quedan en torno a dúas decenas en disposición de traballar, xa que “moitos dos seus traballadores e traballadoras tiveron que empregarse noutros sectores”, e se enfrontan ao risco certo de que “non quede unha soa orquestra antes de que acabe a pandemia”.

Gallego reivindicou axudas “ad hoc” para o sector, que quedou fora das medidas de axuda do goberno galego precisamente polas especificidades do seu traballo. As axudas da Xunta eran en realidade “subvencións para gastos derivados do traballo”, que “dificilmente puideron xustificar cando o que falta precisamente é o traballo”, co que quedaron “de facto” excluídas da liña de axudas, e por iso agora volven reclamar axudas específicas diante do risco de quedar outro verán sen actividade.