A parlamentaria socialista Leticia Gallego urxiu hoxe á Consellería de Sanidade que adopte unha “solución inmediata” para as graves carencias de persoal e material no Centro de Saúde e o PAC de A Guarda. Sinala que o centro está a afrontar a segunda onda da pandemia con só 4 das 8 facultativas das que dispón, que mesmo chegaron a ser só 3 no pasado mes de outubro.

Advirte de que “a saturación do persoal é extrema porque ten que dar cobertura á súa axenda, ao servizo do PAC e agora tamén comunicar os resultados das PCR que se realizan, así como o control de casos sospeitosos de covid – 19”. A situación afecta tamén, advertiu, ao servizo de Urxencias, onde “hai momentos nos que non hai médico para tender aos pacientes de A Guarda, Oia ou O Rosal” nunha zona sen ambulancia medicalizada.

Sinala que o persoal deste centro atópase “ao límite da situación física, psicolóxica e profesional” derivada da deficiente xestión por parte do goberno galego, polo que os sanitarios quéixanse “ante a imposibilidade de cubrir as ausencias dos compañeiros pola falla de médicos de familia, derivado dunha ausencia total de planificación e da precaridade laboral”.

Xuntanza cos alcaldes

A responsable socialista reclamoulle ao goberno galego que atenda á petición dunha xuntanza que lle ten trasladado o Concello de A Guarda, a Mancomunidade do Baixo Miño e a cidadanía da zona a través de 2.500 sinaturas demandando unha solución a este problema.

A cidadanía do Baixo Miño e os seus representantes municipais demandan a resposta da Consellería de Sanidade, que “amosa unha preocupante desidia pola resolución do problema” tanto de falla de persoal como pola situación das infraestruturas logo do derrubamento do teito dunha das consultas o pasado 17 de novembro.

Sinala que “o cadro de persoal ten un especial malestar” por este feito que non rematou en traxedia porque por sorte non había ninguén dentro do habitáculo, e ademais porque “este accidente podería terse evitado de ter atendido ás demandas dos traballadores, que levan moito tempo solicitando arranxos e reparacións na infraestruturas”.