Julio Torrado pídelle á Xunta que cumpra o acordo parlamentario aprobado por unanimidade en 2015 para mellorar o tratamento e a atención ás mulleres con endometriose

Lamenta “o desleixo e desinterese” da Consellería de Sanidade que, 7 anos despois, foi desbotando de maneira sucesiva todos os compromisos adquiridos

O voceiro de sanidade do Grupo Socialista, Julio Torrado, levará unha batería de iniciativas ao Parlamento para reclamarlle á Xunta que cumpra os compromisos aprobados por unanimidade no ano 2015 –a instancias do PSdeG- para mellorar o tratamento e a atención ás mulleres con endometriose no sistema público de Galicia.

Torrado lembra que o acordo adoptado o 22 de abril de 2015 promovía diversas accións que comprometían unha liña de acción implicada coa difusión desta enfermidade e a apertura de maiores posibilidades e accesibilidade ao tratamento. Ao mesmo tempo, elevaban a relevancia que a esta afectación se lle outorgaría dentro do sistema público de saúde de Galicia.

Porén, todos os acordos comprometidos entón “foron desbotados de maneira sucesiva pola dirección da Consellería de Sanidade, amosando un desleixo e desinterese pola cuestión”. Así, “a realidade”, lamenta o deputado socialista, “é que 7 anos despois a avaliación do cumprido por parte do goberno da Xunta de Galicia é a todas luces insuficiente, e non reflicte a relevancia que inicialmente foi demandada polo Parlamento”.

E iso malia que durante estes 7 anos houbo diversas iniciativas parlamentarias alertando sobre o incumprimento e que “foron insuficientes para que existisen explicacións ao respecto e sendo nalgúns casos rexeitadas polo PP, que inicialmente apoiara os acordos”.

Nesta liña, advertiu, por exemplo, de que seguen a atoparse retrasos diagnósticos ante esta doenza. Isto é froito dalgúns incumprimentos, como o adquirido para a difusión da “Guía de coidados” do Ministerio de Sanidade, que unicamente está publicada na web do SERGAS, “pero nin sequera na súa actualización de 2019”. Ademais, o goberno galego tampouco colaborou na elaboración de campañas para fomentar o coñecemento sobre a doenza en mulleres de idades máis novas, ata o punto de que “esta labor é asumida de maneira plena e sen axuda polos colectivos de mulleres afectadas”.

A maiores, Julio Torrado tamén lamenta que o Plan de Detección Precoz da Endometriose, comprometido para iniciarse nun prazo de 6 meses en abril de 2015, “non da sinais de presencia nin é unha realidade de facto”. Tampouco foi completada aínda a creación de unidades especializadas en cada área sanitaria, incluso malia terse reducido as áreas sanitarias en Galicia das 11 existentes entón ás 7 actuais.

Finalmente, entre os incumprimentos, Julio Torrado tamén fai fincapé en que o goberno de Galicia tampouco promoveu ningunha iniciativa ou aposta por avances na investigación e coñecemento da enfermidade dentro do sistema público sanitario e investigador de Galicia. Desta maneira “deixa as posibles melloras en mans de iniciativas privadas ou persoais dos profesionais da investigación en saúde”.