Gonzalo Caballero sinala que o IES de Brión constitúe “a punta do iceberg” da falla de aposta pola educación pública de Feijóo

O secretario xeral do PSdeG, Gonzalo Caballero, apuntou hoxe que o Instituto de Brión constitúe “a punta do iceberg da falla de aposta pola educación pública por parte de Feijóo”. O líder dos socialistas galegos visitou hoxe o centro no que os pais e alumnos se teñen pechado en protesta pola negativa da Xunta a reforzar a plantilla de profesores acorde co incremento de alumnos.

Caballero acusou ao PP de estar “desfigurando a educación pública galega” a través do recorte de persoal, cando non directamente o peche de centros e aulas, “esquecendo” as necesidades dunha educación pública de calidade. Sinalou que precisamente o centro de Brión atópase “paralizado pola incapacidade da Xunta de atopar unha solución, reducindo o profesorado e a capacidade dunha oferta educativa de calidade”.

Saudou o esforzo dos pais e nais e dos alumnos de Brión, que están demostrando un “traballo intenso sen facer ruído pero con argumentos sólidos e cargados de razón”, conscientes de que “cando defenden ao centro de Brión defenden á educación pública de tódolos galegos e galegas”.

Contrapuxo a “aposta clara” do PSdeG pola educación pública de calidade e en igualdade de condicións, e lembrou que foi o goberno de Touriño o que implantou a gratuidade dos libros de texto, que foi suprimida polo PP. O mesmo PP, dixo, do conselleiro de Educación que “abandonou a última Conferencia Sectorial en canto o Ministerio plantexou a redución do número de alumnos por aula e as horas lectivas”.

O secretario xeral do PSdeG comprometeuse a que “todos os nenos e nenas que acudan á escola pública poidan dispoñer de libros de texto, e que as familias non teñan que soportar o sobrecuste de material de setembro”.

Parlamento

O líder dos socialistas galegos acudiu a esta visita acompañado polo portavoz do Grupo Socialista no Parlamento de Galicia, Xoaquín Fernández Leiceaga, quen anunciou o debate na próxima sesión plenaria do Parlamento dunha interpelación sobre a redución da oferta educativa nos concellos. Sinalou que a situación de Brión é unha constante en moitas localidades que se están a coñecer estes días, como Santa Comba ou Allariz.

Anunciou que a interpelación será complementada no Parlamento cunha moción para acadar unha “solución positiva” a estas demandas para “reforzar o sistema educativa e recuperar a súa función de ascensor social e garantía de futuro en igualdade para todos e todas”. Advertiu que “non estamos dispostos a admitir a redución da calidade educativa xustamente porque hai máis nenos” nestes concellos.