Gonzalo Caballero cualifica de “demoledor” o auto do TSXG sobre o certificado covid para a hostalaría: “É unha emenda á totalidade da xestión da Consellería de Sanidade de Feijoo”

O secretario xeral do PSdeG reclámalle a Feijoo que se sente co sector para ofrecerlle seguridade xurídica, pactar a desescalada e establecer un plan de axudas

Gonzalo Caballero visitou hoxe Mondariz, acompañado do tenente de alcalde do municipio, José Luís Fernández Piñeiro, para comprometerse coas necesidades do concello

O secretario xeral do PSdeG, Gonzalo Caballero, cualificou hoxe de “demoledor” o auto do Tribunal Superior de Xustiza de Galicia que rexeita a obriga, imposta pola Xunta, de presentar o certificado covid para acceder aos locais de hostalaría. O líder dos e das socialistas galegos considera que a decisión do TSXG é “unha emenda á totalidade da xestión realizada pola Consellería de Sanidade de Feijoo”.

Gonzalo Caballero lembrou esta mañá que o auto dos xuices deixou meridianamente claro que esa medida atenta contra dereitos fundamentais, que non está xustificada e que discrimina e demoniza ao sector da hostalaría: segundo os xuíces resulta “ineficaz e innecesaria” á hora de evitar posibles contaxios.

Neste contexto, o secretario xeral do PSdeG considera que “queda claro que dende a Consellería de Sanidade non se están a facer ben as cousas” e, polo tanto, “a Xunta de Galicia debe cambiar o rumbo en vez de atacar ao sector da hostalaría e de non ofrecerlle seguridade xurídica na desescalada”. “Non hai reactivación posible”, remarcou Caballero, ”se non se fai de acordo ao Estado de dereito e fortalecendo a sanidade pública galega”. Pero “Feijoo, pola contra, está debilitando a sanidade pública galega e facendo normas ilegais”, indicou.

Por iso, Gonzalo Caballero salienta que “o que debe facer Feijoo é sentarse inmediatamente co sector para establecer un plan de axudas, para pactar a desescalada e tamén para darle seguridade xurídica a unha reactivación na que é prioritario fortalecer o sistema sanitario e fortalecer aos sectores máis afectados”. Fixo especial fincapé no da hostalaría, “que ten tantas dificultades e que necesita a reactivación neste verán”.

VISITA A MONDARIZ

O secretario xeral dos socialistas galegos realizou estas declaración durante unha visita ao concello pontevedrés de Mondariz. Alí recordoulle á Xunta de Galicia que este ano conta con 1.100 millóns de euros adicionais procedentes do goberno central e reclamou que cando menos parte de eses cartos se destinen a paliar as enormes necesidades coas que contan os municipios rurais do país.

Neste senso, o tenente de alcalde de Mondariz, o socialista José Luís Fernández Piñeiro, lembrou algunhas das asignaturas pendentes que a Xunta de Galicia ten co seu municipio.

En primeiro lugar, lembrou que un dos principais problemas que ten agora mesmo o concello son as limitacións que se impuxeron ao respecto dos  transportes pesados, o que impide a circulación de vehículos pesados cara a Ponteares. Fernández Piñeiro reclama que “ou ben se solucione o problema, ou ben se ofreza unha alternativa cun trazado novo a través dunha circunvalación”, tal e como se comprometeu a Xunta de Galicia.

O tenente de alcalde de Mondariz tamén demandou que o goberno galego axilice os trámites para dotar a Mondariz dun parque industrial, “que é moi necesario”.

Por último, lembrou os problemas que existen na actualidade coa EDAR. Foi construída para darlle servizo a 6.000 mil habitantes e –malia que agora mesmo só a están empregando 2.500- Augas de Galicia asegura que xa está ao seu límite, “o cal é incomprensible”. Por iso, solicita que, ao igual que se fixo en Mondariz, se traten de solucionar os problemas de filtracións que hai en outros puntos e que limitan a capacidade da depuradora.