Desleixo de Xunta e Concello de Sanxenxo contra a invasión de cortadera no Polígono de Nantes

A portavoz de Medio Ambiente do Grupo Socialista, Patricia Vilán, reclamou hoxe a intervención do goberno galego para erradicar a invasión de herba da pampa ou cortadera no Polígono de Nantes, en Sanxenxo. A responsable socialista presentou unha pregunta na Comisión de Medio Ambiente de hoxe na que alertou do desleixo tanto do goberno galego como do Concello.

Sinalou que concellos e particulares “toman medidas para erradicar” esta invasión, e apuntou a que “Medio Rural ten un folleto con recomendacións prácticas para a prevención, control e eliminación dos plumachos, mais o folleto da Consellería aínda non debeu de chegar ao alcalde de Sanxenxo, Telmo Martín, porque no Polígono de Nantes non se ten feito nada de nada”.

Amosou a súa sorpresa polo “descontrol” por parte do goberno galego fronte a esta especie, xa que mesmo descoñece o seu nivel de expansión a pesares de que o Parlamento teña aprobado xa en dúas ocasións, en 2010 e 2013, sendas iniciativas para reclamar un plan inmediato de erradicación e control da especie e prohibir o seu uso ornamental.

A pesares destas boas intencións, o executivo amósase “inoperante” neste estremo, visto que “é doado adoptar un mar de plumachos cando se viaxa por Galicia”, e a pesares de que a Xunta falara en 2015 de subvencións ás entidades locais “o certo é que media Galicia segue en guerra contra a herba da Pampa.