Desidia e mentiras da Xunta para deixar a atención á discapacidade “en servizos mínimos”

A portavoz de Política Social do Grupo Socialista, Noela Blanco, denunciou hoxe a “desidia” na atención á discapacidade por parte do goberno galego, logo de constatar unha demora de sete anos na posta en marcha do Centro Galego de Desenvolvemento Integral –Cegadi-. Así o dixo no debate dunha pregunta oral en Comisión sobre a paralización deste centro proxectado e orzamentado polo goberno presidido polo socialista Emilio Pérez Touriño.

Blanco acusou á actual conselleira de Política Social de “mentir” no Parlamento cando, hai un ano e en calidade de directora xeral de Maiores e Discapacitados respondera a unha pregunta da propia Blanco anunciando como “inminente” a posta en marcha do centro. Dixo que “mentiu igual que lles minte aos pais e nais de Ourense, que agardan por un centro de semellantes características”.

A realidade é que a atención a estas persoas está “en servizos mínimos” e “apolillada” como “mostra do desprezo e do desleixo do goberno galego coas persoas con discapacidade”, ás que cando chegan aos 21 anos son enviadas “para casa”.

Blanco lembrou que a propia Estratexia Galega de Discapacidade 2010 – 2013 contemplaba a apertura do centro en 2013, unha apertura que “desapareceu” da seguinte edición da Estratexia, correspondente ao período 2015 – 2020. “non o esquecemos, nin o PSdeG nin as familias que se manifestan cada 15 días para que o centro se poña en marcha”.