A CRTVG agocha deliberadamente o vencello dun detido nunha operación contra o terrorismo xihadista

O deputado socialista Luis Álvarez levou hoxe á Comisión de Control da CRTVG a censura nunha emisión en directo á mención dunha profesional do vencello co PP dun detido nunha operación contra o terrorismo xihadista a comezos de setembro. Advertiu do celo amosado polo ente público cando foi o propio presidente da cidade autónoma e do PP de Melilla, Juan José Imbroda, quen o confirmara en rolda de prensa.

O responsable socialista fíxose eco hoxe no Parlamento da denuncia presentada por unha traballadora do medio logo de ser obrigada esta referencia da súa noticia, sobre a operación de desarticulación dunha célula xihadista en Marrocos e Sevilla. Resultou que un dos detidos mantivera a condición de afiliado a este partido, o que “foi destacado pola práctica totalidade dos medios de comunicación” agás a Televisión de Galicia.

Sinalou o eficaz “cordón sanitario” imposto por este medio “en torno a todo o que ten que ver ou poida supoñer unha mínima mácula que poida afectar ao PP”. Un celo, engadiu, que non se aplica, lembrou, “á hora de incluír nas informacións a familiares de responsables socialistas que teñen que comparecer ante os xulgados”.

Advertiu que a pesares das apelacións do director xeral da CRTVG, quen respaldou a decisión de censurar esta referencia, “obxectivamente pódese ver que debe de existir un botón do pánico por parte de alguén que supervisa as emisións de informativos”. Desta maneira, “cando hai un mínimo compromiso negativo do PP saltan tódolos sistemas de alerta e se reconduce a información”.