Denuncia a “escasa ou nula transparencia” por parte do goberno galego e alerta dun empeoramento no servizo

O portavoz de Transporte do Grupo Socialista, Carlos López Font, esixiulle hoxe á Xunta que “cumpra coa legalidade” no transporte de viaxeiros por estrada. O responsable socialista alertou de que o goberno galego segue a incumprir coas recomendacións do informe do Consello de Contas presentado en outubro do ano pasado no que acusaba ao goberno galego de abdicar das súas competencias e que constitúe unha “emenda á totalidade” da xestión da Xunta.

López Font critica que malia ao “completo tirón de orellas” de Contas, o servizo empeora día a día polo desleixo dun goberno galego que, lembrou, está “obrigado a responder e poñerse a traballar” nun servizo fundamental para a mobilidade dos galegos e as galegas. Advertiu que, segundo sinala o informe, o goberno galego resérvase “demasiado poder discrecional” para introducir criterios políticos nun plan que non foi consensuado nin da resposta ás necesidades da cidadanía.

Aquel informe alertaba de problemas de incumprimento da legalidade, e reprendía ao goberno galego por ter abdicado das súas competencias de inspección e control nos contratos asinados, facendo caso omiso das queixas dos usuarios, aos que contestan “de forma tardía e cunha total falta de solidez”.

Ademais, critica que o goberno galego continúe sen facer nada para resolver os procedementos de infracción abertos nos que renuncian a impoñer as sancións correspondentes, que poderían chegar á rescisión de contratos. Ademais, o informe detectaba a falla de planificación do goberno galego para dar resposta ás necesidades de mobilidade, reclamándolle á Xunta que reforzara o seguimento o dos contratos das concesións para levar a cabo os axustes necesarios.