O candidato á Xunta compromete que as primeiras medidas do futuro Goberno socialista será implantar un plan de choque para “reanimar a Atención Primaria” e reducir os tempos de agarda

Besteiro lembrou que “antes, en Galicia, chamabas ao médico de cabeceira e tiñas cita ao día seguinte. Os recortes do PP de Feijóo déixanlle a Rueda, o presidente ausente, unha herdanza con esperas de ata 15 días, pola súa ineficacia e pésima xestión”.

Afirma que a sociedade galega no seu conxunto expresou o seu cansazo coa xestión de Rueda e lanza un berro de auxilio sobre a desatención sanitaria que vive Galicia

Santiago de Compostela, 4 de febreiro de 2024.– O candidato socialista á Presidencia da Xunta, José Ramón Gómez Besteiro, reafirmou hoxe o seu compromiso con rescatar da UCI á sanidade pública galega que se atopa, afirmou, “en estado crítico” como consecuencia de quince anos de xestión do Partido Popular. “Unha xestión que destaca polo recorte, a precarización e a privatización e que levou, particularmente, á Atención Primaria a unha situación límite”, subliñou.

“En Galicia lembramos cando chamabas ao médico de cabeceira e ao día seguinte xa nos atendía. Hoxe, con Rueda, o presidente ausente, e coa herdanza de Feijóo, a cita pode demorarse ata ata 15 días” afirmou Besteiro que asegurou que “o compromiso dos socialista é claro. Primeiro, cita médica no centro de Atención Primaria en menos de 48 horas, apertura dos centros de saúde; especialistas en Saíde Mental, máis pediatras para nenos e nenas e condicións laborais dignas para os profesionais sanitarios. Quen mellor que os socialistas para xestionar a Sanidade Pública, que fomos quen a creamos, a Sanidade pública e universal. A nosa confianza na Sanidade Pública é total”, ratificou.

“O problema en Galicia non é manifestarse, é enfermar”

Sobre as declaracións de Rueda, acerca da manifestación, Besteiro ironizou que “o problema hoxe en Galicia non é manifestarse, é enfermar: ese é o verdadeiro problema Hoxe estamos aquí porque ese é un verdadeiro problema para moitísimos galegos e galegas”

Besteiro incidiu en que a fórmula para reanimar a sanidade en Galicia pasa por incrementar os orzamentos, recuperar os medios técnicos e humanos coa mellora das condicións dos profesionais e a reabrir os centros de saúde que pechou o PP. “Esta vai ser a unha das primeiras medidas do futuro Goberno socialista no marco dun plan urxente que dirixiremos, principalmente, a recuperar a calidade da Atención Primaria e ampliar as súas especialidades”, afirmou.

O candidato socialista participou hoxe en Santiago na manifestación convocada polo colectivo SOS Sanidade Pública xunto con outros candidatos socialistas ao Parlamento Galego, dirixentes, cargos políticos e militantes do PSdeG. Para Besteiro, a sociedade galega no seu conxunto expresa .con esta protesta “histórica” o seu “cansazo” coa incapacidade xestora e o afán privatizador de Rueda coa sanidade.

Besteiro insistiu en que “Galicia non pode resignarse a non ter suficientes ambulancias, a que 11.000 nenos non teñan pediatra, a que 200.000 persoas agarden por unha primeira cita hospitalaria ou a que haxa cidadáns de primeira ou de segunda para o sistema público de saúde en función do lugar no que vivan”. Porén, fixo fincapé en que a sanidade será a bandeira do Goberno socialista a partir do 18 de febreiro. Un Goberno “que traballará desde o minuto un para recuperar todos os recortes do PP e para instalar un novo modelo de atención pública sanitaria integral”.

Para o candidato á Xunta, é tamén fundamental acabar co nepotismo e a manipulación das listas de espera. “Teñen que ser reais, públicas e transparentes”. Amais destas medidas, o Partido Socialista tamén integrará a Saúde Mental como unha especialidade máis, reabrirá centros pechados por Rueda en zonas rurais, onde os usuarios son máis vulnerables porque non podemos consentir que a poboación teña o médico a máis de 30 minutos da súa casa”.

Debate electoral

Preguntado sobre o próximo debate electoral, Besteiro asegurou que “espera que por fin, o presidente ausente, que non admite máis que un so debate, compareza efectivamente a render contas”. E engadiu que “nós o que lle imos ofrecer a Galicia nese debate é futuro, un futuro mellor coa mellor versión de Galicia; emprego; máis dereitos e, en definitiva, esa aposta por esa Galicia que pode ser moito mellor que ese legado nefasto que deixa o Partido Popular despois de 15 anos de goberno”.