A deputada critica o uso partidista destes fondos concibidos para a mellora das infraestruturas municipais

20 de abril de 2023. A portavoz de Política Local do Grupo Socialista, Begoña Rodríguez Rumbo, denunciou hoxe no Parlamento o “uso descaradamente partidista” por parte do goberno galego dos fondos do Plan Hurbe, deseñados para equipamentos públicos, humanización de rúas e de espazos públicos. Presentou unha pregunta en Comisión na que alertou de que os convenios asinados no terceiro trimestre de 2022 e publicados no DOG o 31 de xaneiro, só inclúe concellos gobernados polo PP.

A responsable socialista criticou o reparto descarado en favor dos concellos dirixidos por alcaldes afíns, que nos convenios publicados entre 2019 a 2022 recibiron o 84 por cento dos fondos repartidos, un total de 23,8 dos 28,5 millóns de euros do programa. Denunciou que “non estamos a falar de igualdade de condicións de tódolos concellos”, e esixiu os criterios de reparto que xustifiquen que “sigan a favorecer aos concellos do PP”.

A parlamentaria socialista esixiu o reparto “en igualdade de condicións” e rematar cunha práctica perversa coa que o goberno galego “diferenza entre proxectos bos e malos”. Citou así á “xustificación” que ofreceu a conselleira de Medio Ambiente, Territorio e Urbanismo no Pleno do Parlamento, aos sinalar que os proxectos presentados por concellos do PP son admitidos porque “son bos” e o resto “son malos”.

Rodríguez Rumbo esixiu o remate desta práctica de reparto clientelar que ten beneficiado a un total de 204 concellos entre os anos 2019 e 2022, dos cales 164 foron do PP, un 80 por cento, fronte ao 12 por cento de gobernos do PSdeG e un 4 por cento do BNG.

Sinalou que tódolos concellos galegos, independentemente da cor política, teñen dereito a acceder en condicións de igualdade a estas axudas deseñadas para mellorar as súa situación urbanística, e que se divide nos programas de equipamentos públicos, humanización de rúas e urbanización e mellora de espazos públicos.