Baltar goberna na Deputación “como un señor feudal” repartindo fondos “como favores”

A parlamentaria socialista Noela Blanco acusou hoxe ao presidente da Deputación de Ourense, José Manuel Baltar, de xestionar o ente provincial “como un señor feudal”. Na comparecencia no Parlamento no debate de Orzamentos, criticou que trate aos alcaldes “como vasallos” repartindo 6,7 millóns de euros –dun total de 8,5- entre concellos do PP.

Mentres as outras provincias presentan un Plan Único con fondos repartidos con criterios obxectivos, explicou, a Deputación de Ourense “obriga aos alcaldes a “axeonllarse e ser do seu gusto para obter os seus favores”. Mentres, dixo, en 2019 era a Deputación que menos proporción do orzamento destinaba á protección e promoción social, e o único orzamento que medra en 2020 é o de persoal.

Blanco criticou que o único interese dos orzamentos da Deputación para o próximo ano sexa aumentar os gastos de persoal “para seguir mantendo a rede clientelar e contentar aos seus socios de goberno de Democracia Ourensana”. Esta partida absorbe o 40 por cento do gasto previsto para 2020, cun incremento de 2 millóns de euros, “5 veces máis do que vostede vai dedicar á promoción da natalidade”, puntualizou.

A parlamentaria socialista advertiu que a xestión de Baltar supuxo a redución de 21.000 habitantes dende 2012, co que xa son 120.000 persoas menos dende 1980, ademais de que Ourense teña aos 32 concellos con menor ratio entre cotizantes e xubilados e a taxa de actividade máis baixa de todo o Estado.

Mofa nacional

A responsable socialista acusou a Baltar e Feijóo de facer da provincia “a mofa de todo o país” ao “ampliar o circo que tiñan montado” acordando con Pérez Jácome, que ata abril era cualificado de “letal” polo presidente da Xunta, intercambiar a presidencia da Deputación pola alcaldía da capital da provincia.

Acusouno de “vender a cidade de Ourense para mercar a provincia e manter o poder a toda costa”, co resultado de “arrastrar o nome da nosa provincia polo barro, avergoñando a toda unha provincia que debera ser coñecida pola súa riqueza natural ou cultural”.