Absoluto desinterese da Xunta polo seu fracaso na incorporación de Robótica na Educación Primaria

O portavoz de Educación do Grupo Socialista, Luis Álvarez, criticou hoxe o desleixo demostrado pola Consellería de Educación diante do fracaso na incorporación nos centos de Educación Primaria da Introdución á Robótica Educativa como asignatura de libre configuración. Álvarez presentou unha pregunta en Comisión logo de constatar que a Xunta pasou de convocar 120 centros a apenas 25 en só tres anos.

O responsable socialista acusou ao goberno galego de “non ter feito unha análise seria da inversión na tendencia dende o pulo inicial para a incorporación deste programa”. Explicou que no curso inicial -2017-18-, foron convocados 120 centros e seleccionados 112, pero no curso seguinte, cando convocaron a 129 centros, só puideron seleccionar 50, deixando vacantes o 60 por centro das prazas, co que no curso actual reduciron a oferta a apenas 25.

Criticou o aparente desinterese da Xunta por analizar os motivos polos que os centros deixaron de solicitar incorporarse a esta asignatura logo da boa acollida inicial, cando resulta “evidente que algo está a pasar para que os centros decidan non sumarse á convocatoria”. Apuntou que a decisión da Consellería de reducir as prazas de 120 a 25 supón un “recoñecemento explícito de que o programa non está a espertar nos centros o interese que se agardaba”.