A Xunta “xoga ao despiste” coa Vivenda de Protección Pública

A portavoz de Urbanismo do Grupo Socialista, María Pierres, acusou hoxe ao goberno galego de “xogar ao despiste” coa Vivenda de Protección Pública pola falla de oferta da Xunta e a baixa execución dos orzamentos previstos polo goberno galego. Pierres presentou unha pregunta oral na comisión de Obras Públicas do Parlamento na que criticou que as eufóricas previsións do goberno galego contrastan cos “paupérrimos” datos reais.

Pierres advertiu que de acordo cos últimos datos oficiais, o goberno galego puxo en circulación 9 vivendas públicas en 2016 e 31 en 2017. Un total irrisorio, dixo, que non chega a atender nin ao 2 por cento dos 14.463 inscritos no rexistro único de demandantes de vivenda pública, que corresponden a outras tantas familias que agardan por unha vivenda pública e que medra a razón de 5 novos inscritos cada día.

Pierres acusou ao goberno galego de facer do Rexistro “algo máis parecido ao servizo de Loterías do Estado” que “dificilmente poderá ser o áxil que pretende cando realmente non existen vivendas” no parque público. Criticou o desleixo do Executivo autonómico fronte ás estatísticas “terribles” que revelan que os gastos de vivenda son unha preocupación para o 95 por cento dos galegos e das galegas, e para o 60 por cento constitúen unha carga pesada cada mes..

A responsable socialista lembrou que o pasado ano foi aprobada unha proposta de Resolución do Grupo Socialista para construír 600 vivendas ao ano, o que incluso dando por bos os anuncios do goberno galego non se acadará ata dentro de “3 ou 4 anos”. Denunciou que “por moitos anuncios que fagan, a realidade é que levan máis tempo” do que comprometen, e esixiulle “realismo” ao goberno galego.