A Xunta ten a obriga de asegurar a actividade produtiva das ferraleaxes de Ferroatlántica en Cee e Dumbría

A portavoz de Industria do Grupo Socialista, Begoña Rodríguez Rumbo, advertiu hoxe que “é competencia da Xunta de Galicia asegurar a actividade produtiva das ferroaleaxes” das fábricas de Ferroatlántica en Cee e Dumbría. A responsable socialista presentou unha pregunta oral na que alertou das “lóxicas dúbidas sobre a continuidade dunha empresa fundamental para a Costa da Morte”, logo da súa venda.

Rodríguez Rumbo advertiu que “o goberno galego non pode obviar que a empresa Ferroatlántica benefíciase de concesións públicas para explotar recursos naturais que son de todos os galegos e as galegas, supeditadas ao mantemento e creación de postos de traballo”. Por iso reclamoulle ao presidente da Xunta que lles responda aos alcaldes e alcaldesas da Costa da Morte, que o 12 de agosto solicitaron unha xuntanza preocupados polo futuro da factoría.

A parlamentaria socialista insistiulle ao conselleiro de Industria, que respondeu á pregunta presentada hoxe, que a empresa “ten a obriga de presentar un plan de viabilidade que garanta a a actividade das ferroaleacións”, que o goberno galego vén de anunciar logo das iniciativas presentadas polos socialistas na Cámara autonómica.

Lembrou que a Xunta “ten a obriga de garantir o cumprimento das condicións esixidas para que a empresa obtivera a resolución definitiva para a concesión dos aproveitamentos hidroeléctricos. Estas pasan pola non segregación das actividades de produción de enerxía eléctrica e ferroaleacións, continuar coa produción de ferroaleaxe e manter o réxime de cotitularidade sen previa e expresa autorización administrativa.

Autorización administrativa

Mentres o goberno galego mantén que a operación non require de autorización administrativa “porque non afecta á titularidade”, Rodríguez Rumbo lembrou que, en xuño deste ano, o Grupo Ferrotlántica SAU, filial de Ferroglobe PLC, acordou a venda da totalidade das accións ao fondo estadounidense TPG Sixth Streer Partners, que á súa vez encomenda a xestión dos activos á empresa Ithaca.

A parlamentaria socialista lembra que a autorización administrativa concedida en 1992 e a conseguinte resolución definitiva de 1994 establecía que o réxime de titularidade non podería ser alterado sen autorización administrativa, ademais de que impedía a segregación das actividades de Ferroatlántica.

Por iso sinala que a venda debe ser autorizada previa e expresamente por Augas de Galicia, que ten a obriga de pronunciarse sobre se o negocio xurídico de Ferroatlántica está suxeito á autorización previa. Esta conleva a presentación dun Plan de Viabilidade que garanta a actividade de ferraleaxes e que especifique a continuidade do funcionamento de todos os fornos e o mantemento do emprego.