A deputada socialista Patricia Vilán reclamoulle hoxe ao goberno galego que remate a concentración parcelaria Meavía – Quintillán, no concello pontevedrés de Forcarei, coa que leva “enredando” dende hai preto de 12 anos. Así o dixo no debate dunha proposición non de Lei presentada hoxe na Comisión de Agricultura, e que foi rexeitada polo PP.

A responsable socialista reclamou unha modificación orzamentaria para inxectar 600.000 euros dos Orzamentos de 2019 para rematar cos traballos pendentes na rede de camiños, executar as obras de acceso ás parcelas e axilizar a tramitación administrativa dos títulos de propiedade para a súa entrega inmediata.

Lembrou que o proceso de concentración parcelaria, que comezaba no ano 2007, foi paralizado polo goberno de Feijóo, que malia que no ano 2016 facía efectivos os actos de toma de posesión das fincas, no ano 2018 aínda estaban “axeitando á legalidade” os títulos de propiedade, e en 2019 anuncia unha partida de máis de 300.000 euros para o remate dos traballos pendentes.

Vilán explicou que estes “traballos pendentes” consisten en “camiños sen executar, afectados sen accesos axeitados ás fincas, moitas delas que non están en condicións de ser traballadas, moitos accesos que precisan movemento de terras e ata un 40 por cento dos camiños sen executar ou mal executados”.

O proceso de concentración afectou a 2.169 hectáreas e 13.283 fincas de 704 propietarios para un concello de 3.541 habitantes, que pasaron, logo da concentración, a reducirse a 1.807 fincas, co que cada propietario ten un promedio de 19 fincas e cunha superficie total de 1.590 metros cadrados. Sen embargo, o fracaso do proceso de concentración provocou que varios dos beneficiarios “optaran por abandonar a actividade agrogandeira”.