A Xunta deixou sen executar 111 dos 160 millóns de euros en infraestruturas para xestión da auga entre 2016 e 2018

O portavoz de Infraestruturas do Grupo Socialista, Luis Álvarez, denunciou hoxe a “xestión nefasta” dos recursos da Xunta para a auga, alertou de que Augas de Galicia tan só executou 49 millóns dos 160 previstos para investimentos entre 2016 e 2018. Así o dixo no debate de totalidade da Lei de garantía de abastecemento nos episodios de seca, que comezou hoxe o trámite parlamentario.

O responsable socialista advertiu que Augas de Galicia, o organismo do goberno galego que xestiona este recurso, deixou sen executar un total de 111 millóns de euros dos que tiña dispoñibles entre 2016 e 2018, tal e como revela a conta xeral do goberno galego. Ademais, sinalou que os poucos investimentos que si executa o goberno galego sofren un “alto grao de opacidade” ao ser realizados sen criterio nin planificación coñecidos.

Álvarez cuestionou hoxe a política de abastecemento e depuración de augas do goberno galego, amparada na Lei de Augas de 2010 que, dixo, coa Lei que comeza hoxe o trámite parlamentario sumará xa 37 cambios normativos a través de 9 leis distintas en tan só 9 anos. Denunciou o desleixo do goberno galego, que ten sen regular o ciclo integral da auga, as traídas ou as tarifas, tampouco potenciaron o pacto local da auga.

Tamén teñen sen redactar as instrucións técnicas de abastecemento e depuración, e aínda non foron quen de desenvolver un “modelo único financeiramente sostible en materia de depuración da auga. Tampouco puideron mellorar a eficiencia da xestión de infraestruturas hidrolóxicas nin a estratexia de xestión de zonas inundables.

Pobreza hídrica

Álvarez sinalou a necesidade desta normativa para “prever chegar a unha situación de pobreza hídrica”. Instou polo tanto a unha planificación hidrolóxica e unha “xestión adecuada á normativa marco da auga” que “cumpra cos obxectivos e garanta suficiente auga potable a medio e longo prazo fronte ás secas cada vez máis intensas e frecuentes, así como unha “xestión integral eficiente dos recursos hídricos”, incorporando o valor ambiental da auga e os sistemas fluviais.

O responsable socialista defendeu á auga como “elemento potenciador, dinamizador e de cohesión do territorio e desenvolvemento territorial”. Chamou a modernizar a rede de abastecemento, modernizar o tratamento de auga potable tamén a través de acordos entre concellos. Reclamou o cumprimento da normativa comunitaria para homoxeneización do sistema tarifario do ciclo da auga e unha maior progresividade no cobro do canon da auga.