A Xunta debe ofrecer “colaboración activa” para aplicar a lexislación sobre eutanasia e morte digna

A portavoz de Xustiza do Grupo Socialista, Patricia Vilán, apelou hoxe á “colaboración activa” da Xunta na aplicación en Galicia da lexislación estatal sobre eutanasia e morte digna. A responsable socialista presentou unha serie de iniciativas nas que tamén reclama un informe público sobre o cumprimento da Lei galega de Dereitos e Garantías da Dignidade das Persoas Enfermas Terminais, aprobada en 2015.

Vilán e o portavoz de Sanidade do Grupo Socialista, Julio Torrado, presentaron esta iniciativa para urxirlle ao goberno galego a dotar ao Sergas dos recursos “materiais e humanos” necesarios para “adecuar a súa dispoñibilidade en consonancia coa lexislación que fose aprobada sobre morte digna e eutanasia no contexto estatal”.

Así o sinalan logo de lembrar que este mesmo ano foi aprobada, co voto en contra de Vox e do PP, a Proposición de Lei Orgánica de regulación da eutanasia, proposta polo PSOE. O texto pasou o seu primeiro trámite no mes de setembro ao ser aprobada a súa toma en consideración, no que supuxo, sinala, “un chanzo máis” no camiño de “darlle unha resposta xurídica, sistemática, equilibrada e garantista á demanda da eutanasia”.

Os parlamentarios socialistas apuntan que “deputadas e deputados debemos lexislar para respectar a dignidade, a autonomía e a vontade de poñer fin á vida de quen está nunha situación que o remita a esixir esta elección como un dereito”.

Instan así ao goberno galego a activar “de maneira áxil e resolutiva” os “mecanismos necesarios para adaptar a lexislación estatal á realidade do sistema público de saúde de Galicia, garantindo así o exercicio do dito dereito cando fose recoñecido”.