A portavoz de Cultura do Grupo Socialista, Concepción Burgo, reclamoulle hoxe ao conselleiro de Cultura que cumpra co compromiso asumido polo goberno de Feijóo dende 2009 para habilitar o Cuartel de San Fernando como sede do Museo da Romanización. Burgo presentou unha pregunta oral no Parlamento na que presentou a demanda da Plataforma Cidadá constituída en defensa do Museo.

A responsable socialista acusou á Xunta de “manipular á cidadanía” para incumprir cunha promesa reiterada dende 2001, que mesmo supuxo o investimento dun anteproxecto de rehabilitación do inmoble histórico por valor de 200.000 euros. Alertou da decepción e descontento que está a sementar entre a cidadanía luguesa a actitude da Xunta, por canto “séntense enganados polo goberno autonómico e discriminados pola falla de compromiso e incumprimento” das súas obrigas.

Burgo advertiu que este descontento tornouse en “indignación social” logo de constatar o rexeitamento do goberno autonómico a intervir en San Fernando, que sería a sede óptima para albergar o Museo da Romanización, que “ten que ser tamén un Centro de Investigación, Conservación e Rehabilitación dos milleiros de pezas históricas que teñen “aparcadas en almacéns mesmo sen catalogar”.

Acusou tanto ao conselleiro coma ao delegado da Xunta en Lugo de “tomarnos o pelo” aos lugueses e luguesas ao intentar desprazar o Museo da Romanización ao Museo Interactivo da Historia de Lugo. Considera “inaceptable e unha falta de respecto que a Xunta intente xestionar unha infraestrutura como o MIHL, que non é da súa competencia, senón do Concello, e que ademais non reúne as condicións necesarias para albergar o Museo da Romanización.

Advertiu que “hoxe están a confirmar que non se pode confiar nas promesas da Xunta” e reclamoulle ao conselleiro que atenda á solicitude dun encontro coa Plataforma Cidadán en Defensa do Museo.