O novo órgano, integrado por alcaldes, alcaldesas e voceiros municipais socialistas, botará a andar no mes de xuño para artellar un fronte común dos concellos fronte á incapacidade da Xunta

A reunión da Executiva, que contou coa presenza do alcalde de Lugo, criticou o asalto á Alcaldía polo PP que aproveitou “o falecemento de tres compañeiros do grupo municipal socialista e a compra dunha concelleira tránsfuga”

Lugo, 04 de maio de 2026. A Comisión Executiva Nacional Galega do PSdeG, reunida esta tarde en Lugo, acordou a creación do Consello Nacional Municipal e aprobou as bases que regularán o seu funcionamento. O novo órgano comezará a operar no mes de xuño de maio e estará composto por alcaldes, alcaldesas e voceiros municipais socialistas de toda Galicia.

O obxectivo é dotar ao municipalismo socialista, o máis importante de Galicia, dun espazo permanente de coordinación política para erguer un fronte común fronte á incapacidade da Xunta de atender as necesidades dos concellos galegos.

Desde o PSdeG sosteñen que a administración local leva tempo sufrindo unha asfixia deliberada por parte do Goberno galego, que descarga competencias e servizos sobre os concellos sen achegar a financiación que lles corresponde.

O Consello Nacional Municipal nace, ademais, coa vista posta nas eleccións municipais de 2027, sinaladas polo secretario xeral do PSdeG, José Ramón Gómez Besteiro, como a primeira gran cita electoral do partido O órgano servirá para coordinar a estratexia dos gobernos locais socialistas, compartir diagnósticos sobre a situación dos concellos e amplificar a voz do municipalismo galego nun contexto de tensión crecente coa Xunta.

Rexeitamento á “indecencia” do PP

A Comisión Executiva Nacional Galega do PSdeG reuniuse en Lugo, a poucos días da moción de censura coa que o Partido Popular pretende arrebatarlle a Alcaldía da cidade ao socialista Miguel Fernández. O propio alcalde asistiu á xuntanza, na que a dirección do partido lle trasladou o seu respaldo e manifestou o apoio explícito á súa xestión ao fronte do Concello.

Os socialistas expresaron tamén un rexeitamento unánime á forma de actuar do PP nesta operación, que cualificaron de moción de censura “indecente”. A Executiva denunciou que o asalto á Alcaldía de Lugo se sostén sobre dous alicerces inaceptables: o aproveitamento do falecemento de tres compañeiros do grupo municipal socialista e a compra dunha concelleira tránsfuga. Para o PSdeG, esta operación supón unha agresión directa á vontade expresada polos lucenses nas urnas e un atentado contra a calidade democrática.