Lara Méndez lamenta que o PP rexeite incorporar axudas directas para compensar a escalada de custes de combustibles, fertilizantes e alimentación animal

A portavoz de Agricultura e Gandaría do Grupo Socialista, acusou hoxe á Xunta de facer “un exercicio de contabilidade creativa” para agochar a falla de axudas aos agricultores e gandeiros polos custes provocados pola guerra de Irán. Méndez afeoulle ao PP que rexeitara a proposta que levou ao Parlamento para pedir axudas directas pola suba de prezos de combustibles, fertilizantes e alimentación animal provocada polo conflito.

Méndez criticou que dos escasos 157 millóns de euros de axudas polos custes do conflito que aprobou o Consello da Xunta a finais de marzo, tan só 19,4 millóns van para o sector agrogandeiro, e nin un euro corresponde a axudas directas. Ademais, criticou que o que fixeron é un “refrito” de liñas de axuda que supostamente xa existían para incluílas no decreto de axudas, incluíndo 11 millóns de estratexias de promoción que xa deberan ter contempladas nos Orzamentos.

Advertiu que as liñas de axuda escollidas polo goberno galego pouco ou nada axudan a paliar os custes de produción das explotacións gandeiras e agrícolas, xa que incorporaron no “remexido” medidas para compra de maquinaria ou fortalecemento de cadeas curtas de comercialización. A responsable socialista preguntoulle ao PP se consideran que os agricultores con problemas de viabilidade “poden pensar en comprar un tractor”.

Acusou ao goberno galego de “poñerse de perfil” e deixar ao sector primario abandonado cando os custes de produción disparáronse un 17 por cento mentres, por exemplo, o prezo do leite baixou 8 céntimos por litro, e o goberno galego “non está a facer nada para defender aos gandeiros fronte aos abusos das industrias”.

A parlamentaria socialista denunciou o desleixo do goberno galego, que deixa o apoio ao sector primario nas mans do goberno central, que este si que ten incorporado 877 millóns de euros para o apoio ao sector primario como parte dos máis de 5.000 millóns de euros que mobilizaron para afrontar á situación provocada polos ataques dos Estados Unidos e Israel a Irán. Lembrou que estas medidas si que inclúen axudas directas que precisan os agricultores e gandeiros.

A proposta que defendeu hoxe na Comisión de Agricultura e Gandaría pedíalle ao goberno galego un Plan extraordinario de apoio ao sector agrogandeiro, unha liña de axudas directas e a posta en marcha de forma urxente dun observatorio de prezos que garanta o seguimento da evolución dos custes de produción no sector.