Carlos López Font alertou de que se trata dun treito onde hai unha escola infantil, múltiples establecementos e unha parada de bus e denunciou que ten “unha perigosidade evidente” porque as persoas se ven na obriga de camiñar pola calzada ante a falta de beirarrúas

O deputado socialista criticou que o Goberno de Rueda alegue que só dispón de 2 millóns de euros para desenvolver proxectos de mellora en oito estradas, “o que demostra unha falla total de preocupación pola veciñanza”

O Grupo Socialista no Parlamento de Galicia reclamoulle hoxe á Xunta unha mellora urxente da seguridade viaria na PO-344 ao seu paso por Barro, en Tomiño. Carlos López Font defendeu en comisión unha iniciativa a través da que se demandan actuacións como a construción de beirarrúas, a instalación dunha iluminación axeitada “e todos os elementos que garantan unha circulación segura tanto para vehículos como para peóns”.

O deputado do PSdeG asegurou que “a realidade mostra carencias evidentes no mantemento e modernización de moitas infraestruturas de titularidade autonómica”, sobre as que o Goberno do PP non adopta medidas eficaces co fin de reducir o risco de accidentes. “Esa falta de resposta pon en perigo a vida dos usuarios e usuarias e reflicte unha xestión afastada das necesidades da cidadanía”, afirmou.

No caso de Tomiño, recordou que o tramo da PO-344 no lugar de Barro é “unha zona residencial moi transitada polos peóns, con múltiples establecementos e parada de bus”, ao que se une a presenza dunha escola infantil nas inmediacións dunha curva, o que supón que, ante a falta de beirarrúas, as familias teñan que recoller en plena calzada a nenos e nenas de menos de 6 anos, o que demostra “unha perigosidade evidente”.

As melloras precisas constitúen, segundo precisou, “unha reclamación reiterada da veciñanza, que leva anos pedindo solucións sen obter resposta efectiva”. “Falamos de persoas maiores, nenos e nenas que se desprazan a pé, de familias ven comprometida a súa seguridade cada día”, advertiu.

Font criticou que a Xunta bote balóns fóra alegando que deu orde de estudo para a elaboración de diversos proxectos relacionados coa seguridade viaria en oito estradas, entre as que se atopa a PO-344, pero sinalou “que só dispón de 2 millóns de euros para todas esas melloras”, o que é “claramente insuficiente e demostra unha falla total de preocupación pola veciñanza”.