Tras reunirse onte con ANEDIA, a deputada Elena Espinosa rexistrou varias iniciativas  para levar esta situación ao Parlamento de Galicia

A Xunta de Galicia está a denegar ou atrasar de maneira sistemática as reducións de xornada laboral ás que teñen dereito as familias con nenos e nenas con diabetes tipo 1. Así llo trasladou onte a Asociación de Nais e Pais de Nenos e Nenas con Diabetes Tipo 1 (ANEDIA) á deputada socialista Elena Espinosa, nunha reunión mantida para analizar as dificultades crecientes que están a atopar as familias para exercer este dereito recoñecido por lei.

Como consecuencia directa dese encontro, Elena Espinosa rexistrou esta mesma mañá as primeiras iniciativas parlamentarias para levar este asunto ao Parlamento de Galicia e esixir explicacións á Xunta polos atrasos, trabas burocráticas e denegacións que están a deixar ás familias nunha situación de clara indefensión.

Durante a reunión, ANEDIA alertou de que, mesmo cando se cumpren todos os requisitos legais, as solicitudes de redución de xornada están a verse bloqueadas ou demoradas durante meses. Unha situación que obriga ás nais e pais a asumir en solitario a carga do coidado, sen o respaldo efectivo da Administración autonómica.

As familias denunciaron tamén un segundo problema de especial gravidade: a falta de emisión ou a demora inxustificada dos informes médicos preceptivos, imprescindibles para iniciar o procedemento administrativo. Sen estes informes, a tramitación nin sequera pode comezar, convertendo un dereito legal nunha carreira de obstáculos.

A diabetes tipo 1 é unha enfermidade autoinmune, crónica e con risco vital, recoñecida expresamente no Real Decreto 1148/2011, do 29 de xullo. Require un control constante dos niveis de glicosa, tratamento intensivo e capacidade de resposta inmediata ante situacións que poden ter consecuencias graves ou mesmo fatais. Mentres os nenos e nenas non contan coa autonomía suficiente para xestionar a enfermidade, o coidado directo, continuo e permanente das familias é imprescindible.

Por este motivo, o Grupo Parlamentario Socialista reclama á Xunta de Galicia que cumpra a normativa vixente, axilice a emisión dos informes médicos necesarios e poña fin ás trabas administrativas que están a impedir o exercicio efectivo dun dereito recoñecido ás familias con menores con enfermidades graves, unha situación que o PSdeG xa trasladou ao Parlamento a través das iniciativas rexistradas esta mañá.