Carmen R. Dacosta sinala que a dirección do ente vulnera os dereitos laborais cun modelo que precariza as condicións laborais, xera inseguridade xurídica e provoca o conflito laboral

A parlamentaria socialista Carmen Rodríguez Dacosta acusou hoxe á directora xeral da CSAG -antes CRTVG- de manter a clasificación profesional do persoal do ente sen actualizar dende hai 30 anos. No debate dunha pregunta en Comisión, Dacosta advertiu que desta maneira queren seguir contratando fóra de convenio e con persoal externo “á carta”.

A responsable socialista dixo que o sistema de clasificación profesional vixente remóntase ao ano 1992, cando a TVG e a radio eran analóxicas, antes da dixitalización, a multiplataforma en redes sociais e a web. Deste xeito precarizan as condicións laborais, confunden as funcións, provocan inseguridade xurídica, desigualdades retributivas e conflitividade crecente, con xa 396 venres negros en protesta pola situación do persoal e a manipulación política dos espazos informativos.

Advertiu que non se trata de casos illados, xa que dende 2018 están a aplicar modificacións substanciais das condicións de traballo sen negociación colectiva, provocando múltiples litixios xudiciais. Ademais, en 2023 104 persoas percibiron complementos por realizar funcións de categoría superior, máis do 44 por cento dos operadores audiovisuais perciben complementos de responsabilidade, mentres outros departamentos con modificacións funcionais non.

Denunciou un sistema “arbitrario e inxusto”, cando grafistas e tituladores vén redefinidas as súas funcións fóra de marco normativo, e nas delegacións territoriais impuxeron a multiplataformación sen criterios claros nin negociación colectiva. Denunciou que se trata dunha “decisión política” a prol dun modelo que aposta pola externalización, a contratación discrecional e o debilitamento do persoal propio.

Dacosta reclamou a reactivación da mesa de clasificación profesional “con calendario e prazos” e que actualice e comunique a masa salarial autorizada por Función Pública. Ademais, sinalou que a dirección debe garantir que as novas funcións sexan reguladas por negociación colectiva e non por imposición unilateral, e cumprir co artigo 22 do Estatuto dos Traballadores, que obriga a contar cun sistema de clasificación negociado, transparente e non discriminatorio.