O líder socialista inaugurou xunto a José Tomé o comité provincial do PSdeG de Lugo, onde criticou o proxecto fallido de Altri  e lembrou que non conta con garantías nin axudas e que carece da conexión eléctrica necesaria: “Lugo non queda desenchufado. Quen queda desenchufado é Altri, un proxecto que non é bo nin para esta provincia nin para a economía do país”

Besteiro sinalou que “crecemos máis ca Unión Europea, repartimos mellor a riqueza e protexemos ás persoas cando hai crises. Ese é o modelo que funciona e o que lle incomoda a dereita e a ultradereita”

O secretario xeral do PSdeG, José Ramón Gómez Besteiro, fixo un chamamento á unidade e ao impulso político durante a súa intervención no comité provincial en Lugo. Subliñou que o partido entra nun novo ciclo no que é imprescindible acadar velocidade de cruceiro e activar ao máximo os proxectos municipais, en contraste cun Partido Popular que só aparece para a foto e usa a provincia como decorado electoral para logo abandonala.

Besteiro lembrou que este é o primeiro comité provincial tras o proceso de primarias, un proceso no que a militancia se expresou democraticamente e no que agora corresponde demostrar unidade total. Recordou que os grandes avances do socialismo en Lugo -como o histórico acceso á Deputación hai vinte anos ou a consolidación dun proxecto provincial estable-,  foron froito dun traballo colectivo e continuado. “Da unidade nacen os proxectos fortes e medran os proxectos que perduran”, afirmou.

O líder socialista puxo en valor a responsabilidade que exerce o PSdeG nos concellos da provincia e en Galicia, onde os alcaldes e alcaldesas socialistas xestionan os intereses de máis do sesenta por cento da poboación. “Temos moitos exemplos de boa xestión municipal, con concellos pequenos que fan un traballo admirable cada día e cidades que avanzan con proxectos solventes, e debemos presumir do que facemos porque é o mellor aval ante a cidadanía”, sinalou.

Crítica ao abandono do PP e ao proxecto de Altri

Besteiro acusou ao Partido Popular de someter Lugo a décadas de abandono: ausencia de vivenda pública, retrocesos sanitarios, falta de atención á dependencia, inacción forestal, nula política industrial e desleixo total coa PAC. “O PP non planifica, non inviste e non defende esta provincia”, suliñou.

Neste contexto situou o proxecto de Altri, que definiu como un “proxecto absolutamente fallido”. Lembrou que non conta con garantías ambientais nin económicas, que non dispón das axudas europeas prometidas e que carece da conexión eléctrica necesaria. “Lugo non queda desenchufado. Quen queda desenchufado é Altri, un proxecto que non é bo nin para esta provincia nin para a economía do país”, concluíu.

Unidade, proxecto político e resposta fronte á dereita

Besteiro explicou que a dereita pretende desgastar ao PSOE con ataques persoais porque non soporta que un goberno socialista faga avanzar o país. “Crecemos máis ca Unión Europea, repartimos mellor a riqueza e protexemos ás persoas cando hai crises. Ese é o modelo que funciona e o que lles incomoda”, explicou.

Apelou tamén á forza da historia socialista e aos retos presentes: consolidar a educación e a sanidade públicas, reforzar a dependencia, impulsar a vivenda pública e garantir a mobilidade como dereito. “Somos un partido con 146 anos de historia -un partido que sempre estivo aí- e tocounos levantar este país moitas veces. Témolo que seguir facendo”, afirmou.

O secretario xeral reclamou traballo diario de cara ás municipais de 2027. “Onde gobernamos debemos demostrar utilidade. Onde non gobernamos temos que explicar con claridade o noso proxecto. Unidos somos unha forza enorme”.