Aitor Bouza acusa ao PP de “sabotear” a declaración de zonas de alugueiro tensionado e reclámalle á Xunta que libere recursos para que os concellos poidan topar os prezos

O portavoz de Vivenda do Grupo Socialista, Aitor Bouza, acusou hoxe ao PP de renunciar á política de Vivenda como demostra a baixa execución no Programa de Acceso á Vivenda, só do 30 por cento en 2024 e apenas o 5 por cento na primeira metade de 2025. Así o dixo na Comisión de Ordenación Territorial do Parlamento na que presentou unha proposición non de Lei para pedirlle á Xunta que garanta recursos para que os concellos poidan topar os prezos de alugueiro, que foi rexeitada polo PP.

Bouza criticou o desleixo do PP en materia de Vivenda -malia que se trata dunha competencia exclusiva- xa que ademais de deixar sen gastar os seus fondos “sabotean” dende a Xunta a declaración de zonas de alugueiro tensionado. Así o dixo no debate da proposta para reclamarlle á Xunta que elimine os atrancos administrativos e garanta recursos para que os concellos poidan establecer zonas de alugueiro tensionado.

O responsable socialista reclamoulle ao PP que siga o exemplo de comunidades autónomas como Navarra ou Cataluña e desenvolva a Lei para implantar un réxime sancionador efectivo que permita levar á práctica a declaración de zonas de alugueiro tensionado. Ademais, emprazou ao goberno galego a desenvolver un rexistro de grandes tenedores de vivenda que permita que os concellos saiban a quen teñen que aplicar a normativa en materia de vivenda.

Bouza criticou que o PP lle teña “pasado o balón” aos concellos a través da última Lei de Acompañamento que os obriga a recompilar unha información que a Xunta xa ten a través do Instituto Galego de Vivenda e Solo -IGVS-. Criticou a oposición frontal do PP á Lei de Vivenda, poñendo atrancos para entorpecer a declaración de zonas tensionadas que garante prezos razoables para os inquilinos e un beneficio do 90 por cento para os propietarios.

Reclamoulle que “se non queren modificar a súa norma” coa que descargan nos concellos unha responsabilidade que lle corresponde ao goberno galego, “a lo menos garantan que teñan os recursos para atopar a información que lles esixen”. Apuntou que a pesares destes obstáculos, a Xunta non puido impedir o “bo traballo” do Concello da Coruña para aplicar a zona tensionada, que sen embargo están entorpecendo no Concello de Santiago.

Espectáculo bochornoso

O parlamentario socialista lamentou hoxe o “espectáculo bochornoso” do PP ao criticar unha suposta falla de diálogo por parte do goberno central, que xa leva seis Conferencias sobre Vivenda dende que está presidido por Pedro Sánchez. Acusou ao PP de seguir a estratexia destrutiva de Feijóo, que esixe diálogo para despois “xuntarse para dicir que non a todo” sen presentar ningunha proposta alternativa.