Lara Méndez alerta da “nula información” do goberno galego e esixe “información real e veraz” sobre as accións turísticas financiadas con cargo a fondos Next Generation

A Comisión de Industria do Parlamento aprobou hoxe unha proposición non de Lei presentada polo Grupo Socialista para reclamarlle á Xunta que faga público o grao de execución das Accións de Cohesión de Destino Turístico -ACD-, que son financiadas polos fondos Next Generation e xestionadas polo goberno galego. A portavoz de Turismo do Grupo Socialista, Lara Méndez, presentou esta iniciativa diante da “falla de transparencia e de información” por parte do goberno galego.

Méndez reclamou ademais información sobre a execución dos fondos e convenios para este mesmo fin, así como a distribución dos fondos polo territorio galego. Afeoulle ao goberno galego que ofreza “pouca, nula ou mala información” sobre o reparto dos fondos, e advertiu que “haberá que facer contas” para coñecer o alcance e repercusión real da xestión destes fondos que fai a Xunta, “e se realmente serven para diversificar e territorializar o turismo”.

A responsable socialista defendeu a necesidade dun uso eficaz deste tipo de iniciativas para diversificar e territorializar o turismo, para reforzar o seu papel como motor económico “ordenadamente e de xeito sostible, acompasando sempre a oferta e a demanda”. Salientou a súa importancia para a economía local, máis alá da estratexia do PP, para quen “parece ser que o Camiño de Santiago é o único produto turístico”, deixando de lado outras iniciativas.

Advertiu que o goberno galego ten anunciado varias iniciativas dirixidas a hoteis balneario, establecementos turísticos no litoral ou o turismo cultural e deportivo en Viveiro a través de convenios, pero sen explicar de onde proceden os fondos nin o seu grao de execución e impacto real.

Explicou que estas Accións de Cohesión de Destino Turístico céntranse nos eixos da transición ecolóxica, transición dixital, cohesión social e territorial e igualdade de xénero, con fondos europeos que son xestionados polas comunidades autónomas e a Secretaría de Estado de Turismo en colaboración cos concellos.

Texto da iniciativa aprobada hoxe:

-“O Parlamento galego insta á Xunta de Galicia a dar conta de:

1. O grao de execución por anualidades das distintas convocatorias postas en marcha pola Xunta de Galicia das Accións de Cohesión de Destino Turístico, así como dos convenios con este mesmo fin.
2. O reparto de fondos territorializados”.