O líder dos socialistas galegos recalca que “catro baróns provinciais do PP sentados nunha mesa camilla e decidindo quen rexe o destino dos galegos nos próximos dous anos é impropio do século XXI”

O secretario xeral do PSdeG, Valentín González Formoso, criticou hoxe a mala imaxe de Galicia que se lle traslada ao resto de España co procedemento escollido polo Partido Popular para substituír ao presidente da Xunta, “escollido lexitimamente polos galegos e as galegas nas últimas eleccións autonómicas”.

“Catro baróns provinciais do PP sentados nunha mesa camilla e decidindo quen vai ser o que rexe os destinos de galegos e galegas nos próximos dous anos, creo que non é a mellor das imaxes en pleno século XXI”, subliñou o líder socialista.

Ao fío disto, Formoso remarcou que hai outros procedementos “moito máis democráticos”, onde a propia militancia do PP  teña a capacidade de decidir quen sería o seu representante “nunha institución tan vital para os galegos e as galegas”.

En calquera caso, o secretario xeral dos socialistas galegos subliñou que “para nós é moi importante que esta situación interina do presidente da Xunta se resolva canto antes”. Así, lembrou a necesidade das medidas e do impulso que se debe levar a cabo para recuperar a economía despois “desta pandemia tan dura” e “no momento máis crítico no ámbito económico e social do país nos  últimos trinta anos”.

Este contexto, remarcou Formoso, esixe que haxa “un goberno dotado de estabilidade” e  formacións políticas no arco parlamentario “dispostas a arrimar o ombreiro nun momento que temos que estar moito máis preocupados das cuestión externas que das cuestión internas das formacións políticas”.