A parlamentaria socialista Paloma Castro vén de reclamarlle á Xunta que cumpra co seu compromiso de mellora das condicións de seguridade na estrada autonómica PO – 308 ao seu paso polo Concello de Poio. Castro presentará unha pregunta oral na Comisión de Política Territorial do Parlamento de Galicia.

A responsable socialista viaxou hoxe ata Poio, onde mantivo un encontro co tenente de alcalde, o socialista Gregorio Agís, antes de visitar un dos tramos pendentes de ser reformados nesta estrada, unha das que rexistran máis sinistralidade. Alerta de que a pesares da perigosidade rexistrada, a Xunta “leva anos poñendo parches, sen levar a cabo unha actuación completa nin implantar unha vía alternativa que facilite a convivencia dos veciños que lindan coa estrada.

Trátase dunha vía que incrementa notablemente o tránsito sinaladamente nas temporadas estivais, coincidindo cunha elevada afluencia de peóns polas beirarrúas. Os veciños levan agardando pola mellora da seguridade nesta vía dende o ano 2018, cando a Xunta comprometeuse a actuar construíndo 3 sendas peonís Fontenla – Combarro, Combarro – Chancelas – Samieira e O Covelo – Raxó, ademais de actuacións complementarias.

Malia este compromiso, a realidade é que ata o momento o goberno galego segue sen rematar esta obra, que suporía un investimento de 6,5 millóns de euros de fondos europeos para rematar no ano 2020. A Xunta só executou o tramo O Covelo – Raxó, pero aínda quedan os outros dous por comezar, malia que hai tres anos era cualificado como “inaprazable”.