A viceportavoz do Grupo Socialista, Paloma Castro, vén de denunciar no Parlamento que os Orzamentos da Xunta para o ano 2022 volven excluír as melloras no saneamento e depuración de augas residuais da Illa de Ons. Presentou unha pregunta oral en Comisión na que acusou á Xunta de desatender ás súas obrigas de protexer o ecosistema e colaborar co Concello no tratamento de augas, sinaladamente nunha zona protexida como a que ocupa Ons, parte do Parque Nacional das Illas Atlánticas.

Castro lembrou que “este verán, e ata o mes de outubro, nos levantamos tódalas semanas con novas na prensa alertando de novos vertidos en Ons” coincidindo coa época de máis poboación na illa, evidenciando que “a depuradora e as melloras feitas foron insuficientes”. Aludiu ao traslado da depuradora e os pequenos investimentos encetados pola Xunta dende setembro de 2014, cofinanciados por fondos Feder nun 80 da UE, e que quedan “moi lonxe de arranxar o problema”.

Sinala que, malia que a presión social obrigara á Xunta a anunciar na prensa o “investimento en saneamento e depuración para o orzamento de 2022”, o certo é que teñen presentado unhas contas para o próximo ano nas que a actuación “non está por ningures”.

Acusou ao goberno galego de “mentirlle de novo á cidadanía, xa que non hai nin unha partida específica destinada a este fin”, por moito que “para lavar a cara anunciaran a construción duns novos aseos públicos na illa”, que foron orzamentados con 50.000 euros exclusivamente a conta da Unión Europea.

Castro lembra a obriga do goberno galego sobre o saneamento e depuración, xa que segundo Directiva Marco da Auga obriga a conservar tódalas augas, e a depuración de augas residuais é precisamente unha cuestión medioambiental e de saúde pública. Por este motivo, a Xunta, como administración competente, ten a obriga de colaborar cos concellos e impulsar un sistema axeitado de tratamento”, sinaladamente na Illa de Ons, que é parte dun Parque Nacional protexido.

Sinala que o goberno galego, consciente desta situación, comprometeuse hai anos a investir nun plan de saneamento corrixindo as deficiencias no noso territorio, pero “a día de hoxe non hai datos sobre o seu nivel de cumprimento”. Lembra que “teñen a responsabilidade e a obriga legal de colaborar e auxiliar ás corporacións locais, tal e como establece a Lei de Réxime Xurídico das Administracións Públicas.