Paloma Castro chama á Xunta a “reestablecer” o persoal sanitario no Centro de Saúde de Campolameiro: “Desmantelaron o centro prescindindo, nos últimos catro anos, dun médico e dun pediatra”

Critica o convenio de reforma do centro asinado por Xunta e concello, xa que é “insuficiente” e o seu cofinanciamento é “inasumible” para o municipio

A deputada pontevedresa Paloma Castro vén de pedir á Xunta que reestableza o persoal sanitario no Centro de Saúde de Campolameiro logo do seu “desmantelamento” por parte do Sergas cando “nos últimos catro anos, prescindiron dun médico e dun pediatra”. Fíxoo, hoxe, a través da presentación dunha iniciativa no Parlamento.

“O Centro de Saúde de Campolameiro é outro exemplo do desleixo do goberno de Feijóo coa sanidade pública e o abastecemento de servizos nos concellos do rural”, denunciou a vicevoceira do Grupo Socialista logo de sinalar que carece de persoal sanitario necesario para prestar “un servizo de calidade”, xa que conta cun cadro de persoal “que se reduce a un médico, unha enfermeira e un administrativo” para unha poboación aproximada duns 2.000 habitantes.

A maiores, incidiu, “hai que ter en conta que non se cobren as baixas ou as vacacións do persoal” co que “o centro queda sen asistencia” para as veciñas e veciños. “É intolerable”, censurou.

“MAL ESTADO DE CONSERVACIÓN DO EDIFICIO”

Doutra banda, Castro criticou o convenio de reforma do centro asinado por Xunta e concello “por valor de 94.812 euros” para “arranxar a cuberta e crear un novo soportal para o acceso dos pacientes dende unha ambulancia” que, ademais, “será cofinanciado, asumindo cada unha das partes o 50% do custo”.

“Isto non é suficiente, xa que o edificio se atopa en mal estado de conservación e ten múltiples carencias”, lamentou a responsable socialista, logo de censurar o cofinanciamento, xa que “sendo a Sanidade unha competencia autonómica e un servizo público esencial, o custo ten que ser asumido integramente pola Xunta e máis tendo en conta que para un concello como Campolameiro case 50.000 euros de investimento nesta obra é un gasto inasumible que suporá un prexuízo para outros servizos”.

Por último, Castro lembrou que, “hai uns meses, o alcalde do PP de Campolameiro anunciou que asinaría un convenio coa Xunta para levar a cabo reformas por valor aproximado de 130.000 euros” e que estas incluirían, entre outras cuestións “un ascensor que dese acceso ao primeiro andar, o acondicionamento dese andar, o cambio de fiestras, o arranxo de humidades ou a pintura”, cuestións “lamentablemente non se atopan no convenio asinado recentemente”.