O PSdeG esíxelle a Xunta e PP que “fagan os deberes en Bruxelas” para frear a competencia desleal de aluminio, aceiro e cemento fabricados por industrias contaminantes de fóra da UE

Nicolás González Casares sinala que a petición do PP de adiar a posta en marcha do axuste de carbono en fronteira provoca inseguridade xurídica e pon en perigo o emprego na industria galega

O europarlamentario galego do PSdeG, Nicolás González Casares, reclamoulle hoxe ás conselleiras de Medio Ambiente e Industria que “deixen de dicir estupideces climáticas” e “fagan os deberes en Bruxelas” para frear a chegada de aluminio, aceiro, cemento ou enerxía producida por industrias contaminantes de fora da UE. Criticou así que o PP galego “non faga nada” diante da petición dos seus homólogos europeos de adiar a posta en marcha do mecanismo de axuste de carbono en fronteira -CBAM-.

O responsable socialista aludiu ás recentes declaracións da conselleira de Medio Ambiente, que se presentou en Fitur esta semana para “vender” Galicia como refuxio climático empregando datos falsos. A conselleira “presumiu” de que a temperatura subira en Galicia 0,20 graos fronte aos 0,25 do resto da Península, cando a realidade é que segundo os datos oficiais subiu 1,3 graos en 2024, e que ademais o clima “non é estanco”.

Reclamoulle á conselleira Vázquez e á titular de Industria que se centren en frear a petición do PPE, que quere adiar a entrada do axuste de carbono en fronteira dende 2026 ata 2028, permitindo a chegada de materiais máis baratos que non pagan a pegada de CO2 e que esta é moitísimo maior que os producidos en Galicia.

Reclamoulle ao PP e á Xunta que “reaccionen e defendan de verdade as aspiracións da industria galega en Bruxelas”. Advertiu que a decisión do PPE pon en perigo “moitísimos postos de traballo” ao competir co aluminio producido por Alcoa, que xa é moito menos contaminante, a produción de aceiro na Coruña, a cementeira de Sarria, ou a produción de hidróxeno, dunha importancia crecente en Galicia.

Explicou que o mecanismo trata de “equilibrar o campo de xogo” e garantir “seguridade xurídica” para os investimentos da industria galega, e por iso é o que están pedindo as patronais do aluminio, o cemento e o aceiro. Puxo como exemplo o caso da produción de aluminio de Alcoa que agora conta cunha pegada de carbono moito máis baixa, está a investir en renovables para descarbonizar a súa produción, achegándose ao aluminio verde, pero que se atopa cun mercado desequilibrado.

Subliñou que se o goberno galego non fai nada diante da petición do PPE, poñerán en perigo estas industrias, polo que lles reclamou que garantan que “outros que están producindo provocando moita maior contaminación e aforrando custes paguen polo CO2 que emiten”.