O PSdeG critica o escaso descenso do paro en Galicia “pola falta dun modelo económico eficaz por parte de Rueda”

Abel Losada, responsable de Economía e Emprego da Executiva dos socialistas galegos, criticou a ausencia dun modelo produtivo predefinido: “Estamos á mercé das forzas do mercado, que responden a intereses particulares e non aos intereses colectivos da nosa comunidade autónoma”

O secretario de Economía e Emprego da Executiva do PSdeG, Abel Losada, valorou esta mañá os datos de paro rexistrado no pasado mes de novembro. En Galicia, o desemprego reduciuse apenas nun 0,39%, unha cifra significativamente inferior ao descenso medio do 0,62% rexistrado no conxunto de España. “Estes datos reflicten un fracaso relativo importante, que se agrava ao considerar a peor evolución demográfica de Galicia e a menor chegada de inmigrantes respecto a outras comunidades”, destacou Losada.

O socialista sinalou que esta situación é consecuencia directa das políticas económicas do goberno galego, ás que cualificou de pouco ambiciosas e carentes de visión estratéxica. “A Xunta limita a súa actuación a esperar a chegada de proxectos, sen desenvolver unha proactividade real que permita dinamizar a economía e xerar emprego de calidade”, afirmou. Ademais, criticou a ausencia dun modelo produtivo predefinido en Galicia: “Estamos á mercé das forzas do mercado, que responden a intereses particulares e non aos intereses colectivos da nosa comunidade autónoma”.

Abel Losada tamén puxo o foco na xestión dos fondos Next Generation, que considerou un exemplo paradigmático da falta de planificación do goberno autonómico. “O único que sabemos ata o de agora destes fondos son os carteis publicitarios que enchen o territorio, pero seguimos sen coñecer as estratexias e os obxectivos que a Xunta pretende alcanzar con estes recursos, cruciais para o desenvolvemento económico de Galicia”, subliñou.

Desde o PSdeG insístese na necesidade de adoptar un modelo económico que priorice os intereses colectivos, fomente a creación de emprego e saque o máximo proveito aos recursos dispoñibles, especialmente nun contexto no que Galicia precisa reverter as súas dinámicas demográficas e laborais adversas. “É hora de que o goberno galego pase da inacción á acción, cunha verdadeira aposta pola planificación e a eficacia na xestión dos fondos e proxectos que están en xogo”, concluíu Losada.