O Parlamento aproba unha iniciativa socialista para unificar e clarexar os protocolos de actuación individual fronte a positivos e contactos estreitos da covid

Julio Torrado urxe unha campaña informativa “clara, directa e áxil” que clarexe á poboación os protocolos a seguir, así como a unificar criterios entre profesionais, rastrexadores e áreas sanitarias

O Parlamento aprobou hoxe por unanimidade unha iniciativa socialista para pedirlle á Xunta que unifique e clarexe os protocolos de actuación individual fronte a positivos e contactos estreitos da covid. A proposición non de Lei foi presentada en Comisión polo portavoz de Sanidade do Grupo Socialista, Julio Torrado, que instou ao goberno galego a iniciar unha campaña “clara, directa e áxil” para informar á poboación sobre os pasos a seguir ante estas circunstancias.

O responsable socialista denunciou “as incertezas” e “a falla de información nítida e unificada” que circula sobre os protocolos de actuación. Así, sinalou que ás “informacións confusas” por parte da Consellería de Sanidade, súmanse “os diferentes criterios aplicados por profesionais e áreas sanitarias”, o que supón “un caos informativo” que xera “inseguridade entre a cidadanía”.

“Non podemos deixar o protocolo en mans do que cada un atope a golpe de Google”, aseverou. Neste senso, Torrado incidiu en que a Xunta “non debe esixir á poboación que sexa proactiva na busca de información sobre protocolos”, xa que “existe moita información non fundamentada, difundida a través de medios que non teñen validez, base legal nin rigor”, mesmo “no propio SERGAS”.

Así, Torrado instou á Xunta a abandonar “as campañas de autobombo” e a apostar por “información real” porque “xa é hora de que algunha das campañas de márketing da Xunta poidan servir” para achegar información á cidadanía.

Doutra banda, o responsable socialista incidiu na necesidade de unificar criterios para evitar “distintas decisións en cada área sanitaria” sobre a realización ou non de PCR en función de cada escenario e lamentou que “a tardía notificación das medidas a tomar” está a contribuír “á confusión”.

Rastrexadores

“O PP confirma que quen contaba alegremente como rastrexadores a todos os médicos de familia é un bocazas”, aseverou Torrado, en alusión ao presidente da Xunta e tralo recoñecemento da voceira do PP, durante a Comisión, de que os médicos de atención primaria non poden estar 15 minutos facendo un labor de rastrexo.

Neste senso, Torrado reivindicou a figura dos rastrexadores como persoal “ao que hai que dedicar investimento sanitario” por parte do goberno galego porque “canta máis xente estea desenvolvendo este traballo, menos propagación do virus haberá” entre a cidadanía.