O Grupo Socialista urxe ao goberno galego a reforzar a unidade de hospitalización de Saúde Mental Infanto – Xuvenil do Hospital de Vigo

Elena Espinosa responsabiliza á Xunta dos reiterados problemas na unidade: “os esforzos dos que falan no servizo non son suficientes”

A portavoz de Sanidade do Grupo Socialista, Elena Espinosa vén de rexistrar unha batería de iniciativas parlamentarias para esixirlle á Xunta que reforce urxentemente os recursos da unidade de hospitalización de Saúde Mental do Hospital Álvaro Cunqueiro de Vigo. Espinosa presentou estas iniciativas diante dos reiterados problemas que está a rexistrar a unidade, o último deles cun intento de fuga esta pasada fin de semana.

A responsable socialista lamenta que a Xunta estea demostrando que “non está á altura da demanda e das necesidades da cidadanía” neste caso de Vigo, que padecen o “fracaso na xestión da saúde mental e da falla de recursos e políticas estables”. Advertiu que a unidade “non ten capacidade para atender a demanda”, o que obriga a desviar moitas das atencións que prestan á unidade de Pediatría ou en Psiquiatría de adultos.

A viceportavoz do Grupo Socialista advirte que “os esforzos dos que fala a Xunta de Galicia estanse a demostrar completamente insuficientes”, polo que esixe o incremento drástico dos recursos destinados á saúde mental infanto – xuvenil para garantir o correcto funcionamento destas unidades en toda Galicia para atender un problema altamente sensible que debera ser prioritario.